OEKUSI, 28 Jullu 2025 (TATOLI) – Abitante sira iha bairru Naktuka aldeia Manan suku Bene-Ufe sub-rejiaun Nítibe, hato’o sentimentu ksolok ba Governu liuhusi Autoridade Rejiaun Administrativa Espesiál Oekusi Ambeno (RAEOA), tanba dezde ukun to’o 2025 ne’e, foin dahuluk Governu bele halo reabilitasaun ba estrada kilometru haat iha bairru Naktuka ne’ebé sei reabilita husi kompañia Bunga Citra Unipesoál Lda.
Sentimentu ksolok ne’e, hato’o husi Xefe bairru Naktuka, Rud Sila, iha ámbitu Prezidente Autoridade RAEOA hamutuk ho Diresaun Rejionál Infraestrutura (DRI) hala’o fiskalizasaun ba projetu reabilitasaun estrada rurál iha bairru Naktuk, ohin.
“Ami agradese, agora hadi’a ami-nia dalan. Iha ne’e, ami hakarak informa de’it katak, dezde ukun-aan to’o ohin loron, foin dahuluk konstrui infraestrutura bázika iha bairru Naktuka, tan ne’e ami rekomenda nafatin atu tau mós ponte tanba uluk Autoridade promete atu tau ponte iha mota Noél-besi, ohin mós ko’alia nafatin dehan iha tempu-badak sei tau ona ponte, entaun Governu hadomi ami, tanba iha ne’e ami terus kuandu tempu udan ami labele hakat mota, depois estrada rai tahu sa’e maka’as, ne’ebé ami husu liuliu ponte tenke tau ona, hanesan dalan komesa aterru daudaun,” nia ko’alia ba Prezidente Autoridade iha bairru Naktuka.
Notísia relevante:PM Xanana orienta Autoridade RAEOA-ADN konstrui ponte iha mota Noebesi bá Naktuka
Iha fatin hanesan, abitante Naktuka, Joaquin Taninas, informa, iha projetu reabilitasaun ne’e, komunidade sira voluntariamentu oferese rai metru-tolu husi estrada sorin ba sorin, nune’e bele fó espasu ba kompañia atu haluan kedas estrada.
“Ami sente kontente tebes tanba estrada agora ateru ona, ita kompara ho uluk dalan klot depois rai tahu, tan ne’e ami komunidade voluntáriamentu entrega ami-nia rai metru tolu husi sorin-sorin atu haluan kedas estrada, kona-ba ai-oan ami la preokupa importante mak hadi’a uluk ami-nia dalan ne’e, depois mak hanoin ami. Ami la ejize no la impede, tanba dezde ukun aan, foin primeira-véz Estadu tau infraestrutura bázika iha Naktuka, ami sei koopera no apoia kompañia atu finaliza lalais, antes udan monu rai, ami bele asesu ona,” nia orgullu.
Notísia relevante:Xanana sei hasoru Prabowo aborda fronteira Naktuka tuir akordu Olanda no Portugál
Iha biban ne’e, Prezidente Autoridade RAEOA, Rogério Tiago Lobato, informa, projetu reabilitasaun nu’udar projetu emerjénsia ne’ebé aprova husi Konsellu Administrasaun Fundu Infraestrutura (KAFI) Oekusi.
“Ohin, ha’u mai fiskaliza obra ne’e, ha’u kontente tanba ha’u haree kompañia hahú aterru ona no moos ona, ohin ha’u husu ba kompañia atu aselera lalais, tanba rai-henek mós besik kedas iha mota Noél-Besi, ne’ebé ha’u agradese foin rona komunidade sira, hato’o sira-nia sente ksolok, ne’ebé ita sei tau matan nafatin ba sira,” Rogério Lobato dehan, iha bairru Naktuka, ohin.
Nia lembra, antes ne’e Primeiru-Ministru observa ona kondisaun estrada iha Naktuka, presiza tau atensaun, atu kompleta mós ponte, nune’e bele fasilita komunidade inklui Polísia Unidade Patrullamentu Fronteira (UPF) atu asegura liña fronteira iha tempu udan.
“Ohin, ha’u rona administradór dehan, tinan-100 ida ona foin mak hadi’a estrada iha Naktuka ne’e, foin daudaun mós Maun-bo’ot Primeiru-Ministru mai haree ona, no dehan, tenki tau matan, projetu emerjénsia ne’e polítika Governu nian, atu hasai povu husi izolamentu, tenke komesa husi estrada, atu bele asesu ba mai,” nia dehan.
Diretór empreza Bunga Citra Unipesoál Lda, Francisco Jorge Carvalho, promete sei kumpre rekomendasaun ne’ebé hato’o husi Autoridade RAEOA, maibé sei hein selebrasaun kontratu, nune’e bele hahú ezekuta projetu referidu.
“Agora ha’u simu ona ordén serbisu, hahú aterru daudaun, ne’ebé ha’u promete semana ida ne’e, hahú lalin ona rai-henek, tanba iha ne’e rai-tetuk, laiha subida, ne’ebé ha’u prontu atu konklui tuir rekomendasaun ne’ebé autoridade propoin, importante mak tenke selebra ona konstratu nune’e ha’u bele hahú serbisu, tanba estrada atu aterru ne’e sei halo ba metru-hitu” nia dehan iha Naktuka.
Notísia relevante:Abitante Bene-Ufe rekomenda MI harii postu provizóriu ba UPF iha Naktuka
Entretantu, tuir dadus husi Diresaun Rejionál Infraestrutura, empreza sira hamutuk145 daudaun ne’e simu ona orden servisu, kona-ba selebrasaun kontratu sei hein verifikasaun tanba proposta neʼebé submete husi empreza sei hetan verifikasuan husi Diresaun Rejionál Infraestrutura, hafoin ne’e enkamiña ba iha Ajénsia Dezenvolvimentu Nasionál (ADN) hodi halo tan verifikasaun finál.
Jornalista: Abílio Elo Nini
Editór: Rafael Ximenes de A. Belo
