OEKUSI, 16 Abríl 2025 (TATOLI)– Primeiru-Ministru, Kay Rala Xanana Gusmão, orienta Auroridade Rejiaun Administrativa Espesiál Oekusi Ambeno (RAEOA), ho Ajénsia Dezenvolvimentu Nasionál (ADN), atu konstrui ponte alternativa ida iha mota Noebesi hodi fasilita bá komunidade sira iha Naktuka no Citrana inklui Polísia Unidade Patrollamentu Fronteira (UPF) bele movimentu ba mai ho seguru.
Tanba ne’e, Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato hamutuk ho Diresaun Rejionál Infraestrutura, akompaña husi Ajénsia Dezenvolvimentu Nasionál (ADN), kuarta ohin, observa direita mota Noebesi ne’ebé lokaliza iha aldeia Manan, suku Bene-Ufe, sub-rejiaun Nítibe, nune’e bele prepara dezeñu no fatin konstrusaun.
Notísia relevante:Xanana husu Naktuka-oan promove dame hodi hein solusaun ba problema fronteira terestre
“Iha sábadu semana kotuk, ha’u ho sira ADN ba to’o Manatutu, Primeiru-Ministru mak fó ordén ba sobu ponte tolu iha ne’ebá atu mai tau fali iha mota Noebesi Naktuka, ita aproveita besi sira-ne’e, sei di’ak mai monta iha-ne’e,tanba Primeiru-Ministru, orienta katak, atu fasilita movimentu komunidade Naktuka inklui fasilita ita nia seguransa UPF atu la’o ba mai ho avontade,” dehan PA RAEOA , iha mota Noebesi Naktuka, ohin.
Ponte ne’ebé sobu iha Manatutu besi sira sei di’ak hela, entaun presiza aproveita tanba ponte ne’e bo’otliu harii iha tempu okupasaun, nune’e sobu halo dezmantelamentu, atu mai monta fali iha mota Noebesi, ida sei monta iha mota sub-rejiaun Pássabe no ida sei monta iha sub-rejiaun Pante Makasar iha suku Cunha, aldeia Maunaebeno.
Tuir nia observasaun kona-ba mota Noebesi nia distánsia kuaze metru-400, karik besi sira-ne’e la to’o atu harii ponte referida, Autoridade RAEOA sei apoia hodi sosa besi foun, nune’e kontinua ponte ne’e to’o ramata.
Notísia relevante:Vise Governadór NTT husu komunidade iha fronteira TL no Indonézia promove dame
“Ita hein to’o fulan-ida tanba agora sira desmonta hela besi sira-ne’e, bainhira sobu hotu, sei lori mai liuhusi ho transporte marítima tula iha ró, Primeiru-Ministru rasik ho Ministru Planeiamentu Investimentu no Estratéjiku sira sei mai to’o ne’e atu haree fatin ne’e, kuandu konkorda ita komesa halo montajén ba ponte,” nia dehan.
Iha fatin hanesan, Diretór Diresaun Rejionál Infraestrutura (DRI), Remigío Nuno Sila, promete iha tempu badak sei dezloka ekipa tékniku atu halo levantamentu dadús, nune’e prepara ba futuru bele kontrui ponte ne’e iha fatin ne’ebé identifikadu antes.
“Ami simu ona rekomendasaun husi Prezidente Autoridade RAEOA, sei mai halo levantamentu dadus hodi tau ka konstrui ponte ne’e , tanba ne’e besik fronteira ami sei komunika mós ho ita-nia seguransa UPF hodi asegura obra Estadu nian”, nia afirma.
Notísia relevante:FOTO ATUÁL: UPF patrulla no garante seguransa ba abitante sira iha Naktuka
Jornalista: Abílio Elo Nini
Editór: Florencio Miranda Ximenes
