OEKUSI, 11 Abríl 2025 (TATOLI)– Vise-Governadór Propinsia Nusa Tenggara Timur (NTT), Joni Asadoma, husu ba komunidade Timor-Leste (TL) no Repúblika Indonézia (RI) iha fronteira terrestre atu hametin dame.
Autoridade NTT, hato’o nia hato’o asuntu ne’e, iha nia diskursu ofisiál iha ámbitu seremónia reativu postu integradu Oésilo ho Pos Linta Batas Negara (PLBN) Napan iha fronteira Oésilo, kinta ne’e.
Notísia relevante:Deputadu CNRT apresia Agência Tatoli nia kobertura kona-ba situasaun iha Naktuka
“Oekusi-oan ho NTT nu’udar maun-alin no mesak família tanba faktu hatudu povu Oekusi no Timur Tenggah Utara (TTU), Timur Tenggah Selatan (TTS), Malaka to’o Kupang, komunikasaun ho lian ida de’it mak lian Baikeno, kuaze kultura mós hanesan. Nune’e hametin dame hodi haburas liutan relasaun di’ak entre nasaun no povu,”nia dehan iha Oésilo.
Biban ne’e, Nia dehan: “Ohin, ita hamutuk iha fatin ne’e, re-ativa fronteira Oésilo ho Napan, nu’udar odamatan ba movimentu ema no sasán atu tama no sai, nune’e Indonézia ho Timor-Leste bele hametin liutan relasaun no hamoris ekonómia povu iha fronteira, maibé kestaun fronteira sei iha segimentu rua mak seidauk rezolve, tanba ne’e husu ba ukun na’in-sira, Timor-Leste ho Indonézia atu rezolve lalais sigmentu rua nee, ida iha Bijaelasunan Pássabe no ida fali iha Naktuka, nune’e povu rai rua ne’e bele hametin liutan sira-nia relasaun di’ak iha fronteira”.
Iha biban ne’e, Prezidente Autoridade RAEOA, Rogério Tiago de Fátima Lobato, hateten kona-ba kestaun fronteira Naktuka, fó fiar ba Primeiru-Ministru Kay Rala Xanana Gusmão ho Prezidente Repúblika Indonézia mak sei rezolve.
“Ita nafatin iha esperansa atu nune’e problema segimentu rua iha Bijaela Sunan Pássabe ho Naktuka, tempu badak sei rezolve. Ha’u fiar katak Maun Bo’ot Primeiru-Ministru, Kay Rala Xanana Gusmão ho Prezidente Indonézia, Prabowo Subianto, ne’ebé iha relasaun di’ak, tanba Prezidente Prabowo iha relasaun emosionál ne’ebé di’ak ho Timor-Leste, iha tempu naruk nia laran no nia sempre dehan TL iha ninia fuan,” nia katak.
Tanba, nia dehan, antes ne’e iha Prezidente Suharto, Prezidente B.J Habibi, Prezidente Megawari Sukarno Putri, Prezidente Sosilo Bambang Yudhoyono no agora Prezidente Prabowo Subianto, sempre iha komitmentu bo’ot hodi rezolve disputa rai iha fronteira no daudaun ne’e falta de’it segimentu rua ne’e de’it ona mak sei iha prosesu diskusaun husi ekipa fronteira rai rua, espera sei rezolve problema ne’e husi ukun na’in sira,” dehan nia.
Notísia relevante:Xanana husu Naktuka-oan promove dame hodi hein solusaun ba problema fronteira terestre
Notísia relevante:UPF ho Satgas-Pamtas halo patrullamentu koordenasaun iha Naktuka
Jornalista: Abílio Elo Nini
Editór: Florencio Miranda Ximenes
