RAEOA submete ona proposta dezeñu BoQ iha KAFI atu reabilita Monumentu Lifau

OEKUSI, 31 Jullu 2026 (TATOLI) – Autoridade Rejiaun Administrativa Espesiál Oekusi Ambenu (RAEOA), liuhusi Diresaun Rejionál Serbisu Obra Públika, submete ona proposta dezeñu Bill of Quantity (BoQ) ba iha Konsellu Administrasaun Fundu Infraestrutura (KAFI) atu halo reabilitasaun ba Monumentu Lifau.

Notísia relevante:Reuniaun KAFI iha Oekusi, projetu 30 aprovadu inklui monumentu Lifau

Diretór Rejionál Serbisu Obra Públika Oekusi, Remígio Nuno Sila defende katak monumentu Lifau, presiza hadi’a nu’udar fatin turizmu relijioza ida iha Oekusi, tanba kristianizmu tama dahuluk mai Timor-Leste liuhusi odamatan Lifau.

“Monumentu Lifau, dadaun ne’e nia proposta husi RAEOA aprezenta ona ba iha ADN,I.P atu enkaixa iha grande projetu MPIE KAFI nasionál nian, tanba iha projetu lima husi Oekusi tama iha kategória KAFI nasionál,” nia hateten ba jornalista sira iha Oekusi, ohin.

Nia hateten, antes ne’e, iha reuniaun Autoridade RAEOA deskuti ona ba aprovasaun dezeñu BoQ, atu halo separasaun, karik nia orsamentu mai husi fundu KAFI, aprovasaun ba dezeñu BoQ tenke husi nasionál, nune’e labele prejudika Autoridade RAEOA liliu Obra Públika iha futuru.

Nune’e mós karik nia orsamentu husi fundu Konsellu Administrasaun Fundu Espesiál Dezenvolvimentu (KAFED) RAEOA nian, entaun nia dezeñu BoQ tenke husi Obra Públika Oekusi.

“Proposta bele husi RAEOA, maibé orsamentu husi nasionál entaun nia aprovasaun dezeñu BoQ tenki husi nasionál, nune’e bele ekilibriu, atu limita auditória iha futuru labele prezudika uzu kompeténsia, maibé proposta ita hato’o ona ba nasionál no submete ona ba KAFI, hodi deside nia fundu ne’e, ne’ebé ita hein de’it desizaun mai, tanba ita la’ós membru KAFI,” nia hateten.

Notísia relevante:FOTO ATUÁL: Konstrusaun Morru Protesaun ba Monumentu Lifau ne’ebé abandonadu

Entretantu, antes ne’e iha loron 20 Abríl 2026, Prezidente Konsellu Administrasaun Fundu Infraestrutura, Gastão Souza, atuál Ministru Planeiamentu Investimentu no Estratéjiku (MPIE), realiza ona reuniaun daruak ho membru KAFI sira iha Oekusi no konsege aprova projetu emerjénsia 30-resin inklui monumentu Lifau no Jardim Oébau.

Projetu hirak-ne’ebé aprovadu iha reuniaun ne’e, maka Institutu Politéknika Betanu (IPB), estrada husi Oéleu ba Lolotoe iha munisipíu Bobonaro, balu ba postu saúde no projetu balu presiza re-dezeñu no mós irigasaun Karau-Ulun no projetu balu iha Oekusi hanesan Monumentu Lifau, Jardím Oébau ho tan morru protesaun ba ponte Noefefan.

Notísia relevante:RAEOA hein autorizasaun Governu Sentrál kona-ba kontinuasaun projetu monumentu Lifau

Jornalista: Abílio Elo Nini

Editór: Rafael Ximenes de A. Belo