Abandona projetu, PA RAEOA keixa empreza konstrutora CP Unipesoál Lda ba CAC

OEKUSI, 03 Agostu 2026 (TATOLI) –  Prezidente Autoridade Rejiaun Administrativa Espesiál Oekusi Ambenu (RAEOA), Régio da Cruz Salu, submete ona karta keixa iha Komisaun Anti Korupsaun (CAC) atu investiga empreza konstrutora CP Unipesoál Lda,  tanba abandona projetu reabilitasaun estrada rurál husi bairru Kusi aldeia Hau-Tefo suku Ban-Afi sub-rejiaun Nítibe liga ba suku Malelat sub-rejiaun Pássabe, ne’ebé abandona dezde 2022 to’o ohin loron.

“Ha’u simu ona vizita husi Komisáriu CAC iha fulan kotuk. Ha’u mós levanta asuntu ne’e, aleinde ita hein, maibé ha’u rasik hakerek karta ba CAC tanba povu presiza estrada, ne’ebé prosesu investigasaun la’o nafatin, tanba ne’e tama ona iha nivél  ne’ebá, maibé ita tenke rompe izolamentu iha área ne’ebá,” nia hateten ba jornalista iha Oekusi, foin lalais ne’e.

Notísia relevante:PA RAEOA xamada kompañia rua loron 60 tenke finaliza estrada rurál Pássabe

Régio da Cruz, konsidera abandona projetu, Governu tenke sente sala liliu Autoridade RAEOA tanba emite kontratu ba parseiru estratéjiku timoroan ida, maibé ikusmai estagna eh abandona konstrusaun ne’e, povu maka sai vítima ba sira-nia lutu, plantasaun inklui rai.

“Ha’u simu ona Komisáriu CAC, ha’u rasik levanta ona asuntu ne’e ho kazu seluk tan ne’ebé kategória mós projetu abandonadu, maibé iha flexibilidade kapas tebes, ne’ebé formalmente ha’u haruka ona karta ba CAC, atu haree oinsa maka Autoridade RAEOA bele kontinua, ita espera antes Dezembru 2026 projetu ne’e bele kontinua, atu fasilita movimentu husi Kusi suku Ban-Afi to’o suku Malelat bele la’o di’ak ona,” nia afirma.

Notísia relevante:PDHJ Oekusi deskobre empreza konstrutora rua abandona projetu estrada no bee-moos iha Pássabe

Rekorde fali katak, iha 2025 parte Provedória Direitu Umanu no Justisa (PDHJ) Oekusi konsege halo monitorizasaun no rejissta ona nu’udar projetu abandonadu husi kompañia CP Unipesoál Lda, no rekomenta ba Governu presiza fó solusaun.

Asuntu ne’e, Jornalista Ajénsia Tatoli I.P, esforsa atu konfirma ho parte kompañia CP Unipesoál Lda, maibé laiha nia paradeiru iha Oekusi.

Entretantu, Kompañia CP Unipesoál Lda reabilitasaun estrada rurál hahú husi bairru Kusi aldeia Hau-Tefo suku Ban-Afi sub-rejiaun Nítibe liga ba suku Malelat sub-rejiaun Pássabe ho valór kontratu hamutuk $784,814.50.

Jornalista: Abílio Elo Nini

Editór: Rafael Ximenes de A. Belo