Autoridade Bobonaru hahú konstrui saladeaula foun no reabilita EBC Dom Caileto
BOBONARU, 03 Agostu 2026 (TATOLI) – Autoridade Munisípiu Bobonaru hahú implementa projetu konstrusaun saladeaula foun tolu no reabilitasaun sala neen iha Eskola Bázika Sentrál (EBC, sigla portugés) Dom Caileto, iha suku Bobonaru Vila, postu administrativu Bobonaru, ho objetivu atu hadi’a infraestrutura eskolár no garante prosesu ensinu-aprendizajen sai di’ak liu.
Obra ne’e empreza Asa-Dasi mak responsabiliza ho orsamentu hamutuk $227.100,99, ne’ebé finansia liuhusi Program Dezenvolvimentu Integradu Munisipál (PDIM) 2026.
Diretór empreza Asa-Dasi, Óscar Francisco Noronha da Costa, hatete katak serbisu fizíku hahú iha semana kotuk, depoizde remata prosesu mobilizasaun materiál lokál no fabrikadu bá fatin projetu.
“Obra to’o ona 11%. Ba konstrusaun foun ami remata ona limpeza rai no hahú ona halo fundasaun. Enkuantu ba reabilitasaun, servisu plester remata ona no agora hein ba etapa tuirmai”, Óscar informa ba Jornalista sira, ohin.
Nia hatete mós katak kompañia sei kontinua halo serbisu tuir oráriu ne’ebé determina iha kontratu atu asegura projetu remata tuir tempu.
Iha fatin seluk, Adjunta-Diretóra EBC Dom Caileto, Elísia Lopes, haktuir katak komunidade eskolár sente kontente tebes ho implementasaun projetu ne’e, tanba durante tinan barak estudante ho manorin sira hein hela atu hetan saladeaula foun no reabilitasaun ba edifísiu tuan sira.
Nia salienta katak edifísiu eskola balun konstrui deade tempu portugés no kondisaun zinku, janela no odamatan sira aat ona, ne’ebé afeta ba ambiente aprendizajen.
“Ami kontente tebes tanba Governu realiza ona projetu ida-ne’e. Bainhira obra remata, ami bele hala’o aula iha turnu ida de’it iha dadeer, tanba espasu nato’on ona. Uluk ami tenke uza turnu rua, dadeer no loraik”, nia relata.
Maski obra sei la’o hela, Elísia dehan prosesu ensinu-aprendizajen kontinua lao normál. “Ami-nia ensinu aprendisajen lorooron kontinua la’o ho sala tolu. Ami fahe turnu rua, maibé ami fahe oras de’it, husi primeiru anu, segundu no terseiru tama dadeer oras rua, ba sira segundu siklu tama iha tuku 10 to’o 12 depois ami kontinua ho terseiru siklu hahú husi tuku 01 to’o tuku 05 lokraik”, nia informa.
Notísia relevante: Kondisaun sala aula haat iha EBC Dom Caileto la seguru ba estudante sira
Elísia fiar katak projetu ne’e bele hadi’a kondisaun infraestrutura eskolár no hasa’e kualidade edukasaun ba estudante sira iha EBC Dom Caileto.
Estudante EBC Dom Caileto iha tinan letivu 2026 hamutuk 360 no iha profesór na’in-18, inklui dirijente eskola.
Notísia relevante: EBC Dom Caileto falta profesór disiplina tolu
Jornalista: Sergio da Cruz
Editora: Maria Auxiliadora
