Projetu emerjénsia 22 iha Oekusi rejista iha narrativa OJE 2027
OEKUSI, 03 Agostu 2026 (TATOLI) – Diresaun Rejionál Serbisu Obra Públika submete ona projetu emerjénsia hamutuk 22 ba Konsellu Administrasaun Fundu Espesiál Dezenvolvimentu (KAFED) Rejiaun Administrativa Espesiál Oekusi Ambenu (RAEOA), hodi rejista iha narrativa Planu Asaun Anuál (PAA) Orsamentu Jerál Estadu (OJE) 2027 nian.
Diretór Rejionál Serbisu Obra Públika Oekusi, Remígio Nuno Sila, informa katak projetu sira-ne’e implementa ona iha tinan-2025 iha mandatu Autoridade sesante sira, maibé enfrenta prejudikasaun tanba balun la iha orsamentu no balun to’o ohin loron seidauk hetan alokasaun orsamentu.
“Tanba ne’e, Autoridade atuál esforsa no aprezenta ona ba iha Governu Sentrál liuhusi KAFED RAEOA, no ita mós impoin ona, rejista ona iha narrativa orsamentál 2027 atu aprezenta ba ministériu relevante sira hodi konsidera, tanba ne’e dívida ida ba Governu liuhusi Autoridade RAEOA atu responde iha orsamentu tinan oin,” nia hateten ba jornalista sira iha Oekusi, ohin.
Notísia relevante:Rogério Lobato suspende projetu emerjénsia 154 ne’ebé simu ona orden serbisu
Nia dehan, Autoridade RAEOA liuhusi Diresaun Rejionál Obra Públika no Prezidente Autoridade RAEOA aprezenta bebeik ona ba Sekretáriadu KAFED RAEOA atu konsidera, atu nune’e karik la konsege rezolve iha tinan ne’e, presiza garante nafatin pagamentu ba empreza 22 ne’e iha OJE 2027.
“Daudaun ne’e projetu 22 ne’e paradu, ita mak fó notifikasaun dezde loron 10 Marsu 2026, atu para tanba orsamentu seidauk iha,” nia afirma.
Nia esplika, projetu emerjénsia 22 ne’ebé implementa ona mak hanesan reabilitasaun estrada rurál iha Sikone (suku Lalisuk no Bobokase), suku Cunha (aldeia Maunaebeno), Oélulan (suku Naimeko), no iha suku Bobometo (Nianapu, Sabén no seluk tan). Sakatúm de’it, parseira sira foka liuba konstruksaun moru protesaun ba natar no to’os iha suku Lalisuk, Cunha, Lifau, Suni-Ufe, inklui moru protesaun ba hela-fatin.
“Projetu 22 ne’e tama iha kontratu temporáriu, ne’ebé ezekusaun iha terrénu mós la’o, balu progresu di’ak no balu progresu ladún la’o, maibé depoizde ita hasai karta notifikasaun atu suspende tanba ho razaun orsamentu laiha, tenki aprezenta ba Governu Sentrál, tanba inisíu ne’e desizaun mai husi Autoridade sesante sira, hafoin mudansa estrutrutura, Governu Sentrál avália katak, iha irregularidade balu, entaun autoridade atuál tenki suspende temporária ba projetu sira-ne’e,” nia hateten.
Nia haktuir tan: “Se tinan ne’e la rezolve, signifika ita tenki rezolve iha tinan oin, tanba ezekusaun projetu nia progresu fizíku balu la’o ona, ne’ebé narativa ita aprezenta ona iha Governu Sentrál liliu ministériu relevante sira atu konsidera iha OJE 2027 hanesan dívida.”
Notísia relevante:MOP sei avalia lista projetu emerjénsia iha Oekusi
Jornalista: Abílio Elo Nini
Editór: Rafael Ximenes de A. Belo
