BTL Bobonaru instala metru-kontadór 1.838 no halibur reseita rihun $48
BOBONARU, 04 Agostu 2026 (TATOLI) – Empreza estatál Bee Timor-Leste (BTL. E.P) Delegasaun Territoriál Munisípiu Bobonaru instala ona metru-kontadór hamutuk 1.838 iha sistema bee-moos urbana iha Maliana, Kailaku, Loloto’e no Balibó durante periodu Janeiru 2026 to’o agora.
Husi implementasaun sistema tarifária ne’e, BTL rekolla reseita hamutuk US$48.858,35, inklui kustu administrativa ba ligasaun foun ho kada metru-kontadór $55.
Koordenadór BTL Munisípiu Bobonaru, Adriano da Cruz, hatete iha Maliana de’it instala ona metru-kontadór hamutuk unidade 1.444, maibé kliente balun seidauk hetan metru-kontadór no kontinua tama iha kategoria non-metru ho tarifa fixa 2,80 kada fulan.
“Nune’e ami halo hela mapeamentu ba kliente sira ne’ebé seidauk iha metru-kontadór atu haree uluk presaun bee no kualidade bee. Bainhira kondisaun di’ak no aprovasaun mai husi nasionál mak ami sei instala metru-kontadór ba sira”, dehan.
Nia esplika katak BTL seidauk instala metru-kontadór iha área balun hanesan Zona II Maliana, inklui aldeia Oplegul, Bilicou no Taz, tanba kualidade bee husi fonte Bere-Mau dalabarak sai merak iha tempu udan, ne’ebé bele estraga metru-kontadór.
Iha postu administrativu Kailaku, BTL instala ona metru-kontadór 202, enkuantu iha Lolotoe instala ona 188. Ba postu Balibó, Adriano dehan projetu transformasaun sistema rurál ba urbana sei la’o hela ho alvu instalasaun metru-kontadór hamutuk 373, no provizoriamente kliente 304 rejista ona atu simu ligasaun foun.
“Dalaruma molok Setembru bele finaliza ona. Bainhira entrega ba BTL mak foin bele aplika tarifa ba sistema Urbana Balibó, simplesmente sistema Urbana Balibó hetan ona sosializasaun husi ezkutivu husi nasionál no ekipa, maibé mos la taka dalan bainhira kompañia finaliza ona projetu ne’e ita sosializa tan molok aplika tabele tarifária”, dehan.
Atu garante servisu distribusaun bee-moos, BTL koloka tékniku operadór sira iha zona hotu-hotu iha Maliana, Kailaku no Lolotoe atu halo operasaun, manutensaun no monitoriza metru-kontadór, nune’e mós prevene kliente sira husi estraga instalasaun públika.
“Se deteta kliente estraga metru-kontadór ka sistema bee-moos, etapa dahuluk ami halo konxiensializasaun. Maibé se la kumpre regras, ami sei fó notifikasaun no aplika sansaun tuir lei. Kliente ne’ebé estraga metru-kontadór bele hetan multa entre $50 to’o $55, no tuir gravidade violasaun bele to’o $90 ka $100, hanesan kliente ida agora kumpre selu multa ona”, katak.
Aleinde kontrolu ba sistema, koordenadór ne’e akrexenta katak BTL mós esforsu atu halo tratamentu ba bee-moos ho kualidade molok distribui ba kliente sira.
Notísia relevante: BTL Bobonaru rejista diminuisaun reseita iha 2025
“Foin daudaun ekipa laboratóriu husi nasionál dezloka bá iha ne’ebá foti ona amostra la’os de’it iha Lolot’e, maibé mós iha Kailaku, Balibó no Maliana rasik ho objetivu atu asegura kualidade bee-moos ba ita-nia kliente, konsumidór sira”, nia salienta.
Adriano mós husu ba komunidade iha Maliana, Kailaku no Lolotoe atu hadomi no kuidadu instalasaun bee-moos ne’ebé Governu estabelese, tanba instalasaun hirak ne’e sosa ho kontribuisaun kliente sira rasik.
“Bainhira bee la sai, favór ida labele estraga ekipamentu. Se estraga, kliente rasik mak sei responsabiliza ba kustu substituisaun no multa tuir regulamentu”, katak.
Sistema bee-moos rurál ne’ebé BTL seidauk halo tranformasaun urbana mak iha postu administrativu Atabae no Bobonaru.
Notísia relevante: Autoridade Bobonaru-WaterAid formula estratéjia ba Planu Estratéjiku BESI
Jornalista: Sergio da Cruz
Editora: Maria Auxiliadora
