Estudante 131 iha EBF Manu-Aman asesu merenda eskolár iha dapur la adekuada
BOBONARU, 05 Agostu 2026 (TATOLI) – Estudante hamutuk 131 iha Eskola Bázika Filiál (EBF, sigla portugés) Manu-Aman, suku Tapo-Memu, postu administrativu Maliana, Munisípiu Bobonaru, sei hasoru kondisaun dapur merenda eskolár ne’ebé la adekuada no la seguru, ne’ebé bele ameasa kualidade ai-han no saúde estudante sira, liuliu durante tempu udan no bainhira anin-boot.
Xefe Aldeia Manu-Aman, Marçal Lau Saca Noronha, ne’ebé reprezenta inan-aman alunu sente preukupa no konsidera kondisaun dapur ne’e la garante ijiene ba estudante sira.
“Tempu udan, fatin tein ne’e la di’ak tanba udan tama, tahu. Bainhira loromanas, anin lori rai-rahun tama ba ai-han. Labarik sira dalaruma han hamutuk ho rai-rahun, tanba dapur ne’e loke de’it”, nia informa kuarta-feira ne’e.
Nia hatutan katak durante tempu udan, koziñeira ne’ebé prepara merenda eskolár dalabarak tenke tein iha nia uma rasik, hafoin lori ai-han mai bá estudante sira, tanba dapur eskola la fó seguransa atu prepara merenda.
Marçal mós hatete katak komunidade hato’o ona problema ne’e iha enkontru Programa Nasionál Dezenvolvimentu Suku (PNDS), maibé resposta ne’ebé simu mak limitasaun orsamentu, no to’o agora seidauk iha serteza kona-ba tempu implementasaun ba reabilitasaun.
“Fatin tein ba estudante EBF Manu-Aman nia ne’e ha’u sente grave liu iha postu Maliana mak ida-ne’e. Durante ne’e sira parte edukasaun mai vizita más nunka dehan atu hadi’a”, nia lamenta.
Koordenadór EBF Manu-Aman, Adelino Santos, reforsa katak kondisaun dapur merenda ne’ebé agora uza hela ne’e la apropriada atu prepara ai-han ba estudante sira.
“Bainhira anin-boot, rai-rahun tama ba ai-han ne’ebé estudante sira sei konsome. Situasaun ida-ne’e bele kria risku ba saúde labarik sira”, katak.
Notísia relevante: PNDS Lahomea hahú konstrui estrada no dapur merenda eskolár
Adelino rekomenda, liuliu ba Ministériu Edukasaun, atu fó atensaun ba reabilitasaun dapur merenda eskolár ne’e, tanba eskola hato’o ona problema ne’e ba autoridade kompetente, maibé seidauk iha asaun konkreta.
Maski hasoru limitasaun infraestrutura, implementasaun Programa Merenda Eskolár iha EBF Manu-Aman durante ne’e kontinua la’o di’ak tuir menu ne’ebé determina ona, hodi atende estudante hamutuk 131.
Notísia relevante: Monitorizasaun PME iha Bobonaru identifika diferensa fornesimentu nutrisaun ba estudante iha área urbana no rurál
Jornalista: Sergio da Cruz
Editora: Maria Auxiliadora
