Prezidente RAEOA simu ona proposta BoQ husi Samhee atu kontinua edifísiu administrasaun

OEKUSI, 05 Agostu 2026 (TATOLI) – Empreza konstrutora internasionál Samhee Construction Ltd submete ona proposta dezeñu no Bill of Quantities (BoQ) foun ba Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, hodi hetan analíza téknika atu kontinua konstrusaun edifísiu sentru administrasaun Oekusi nian, ne’ebé paradu no abandona dezde tinan-2018.

Iha deklarasaun ba jornalista sira iha Oekusi, Prezidente Autoridade RAEOA konfirma katak proposta ne’e kompleta ho timeline (kronograma) hodi halo servisu fazeadamente to’o finaliza projetu ne’e.

“Semana rua liubá, kompañia aprezenta ona mai Autoridade RAEOA, proposta dezeñu ho time-line atu halo serbisu fazeadamente to’o kompleta projetu ne’e no tarjetu 2027 atu finaliza, maibé antes ne’e mós ha’u hato’o ona karta ida ba ADN,I.P no Obra Públika atu ajuda halo BoQ foun,” Régio da Cruz Salu deklara.

Notísia relevante:PM Xanana sei haruka ekipa ida auditoria ba konstrusaun futuru edifísiu RAEOA

Reuniaun konjunta no avaliasaun legál – téknika

Maske empreza submete ona proposta, Autoridade RAEOA sei la foti desizaun unilaterál. Iha semana oin, Autoridade sei konvoka reuniaun inter-institusionál ida ne’ebé envolve parte téknika, legál, no entidade aprovizionamentu.

“Semana oin sei konvida parte haat, husi Samhee, Obra Públika, ADN,I.P no CNA, atu haree proposta Samhee ne’e, tanba proposta ne’e iha ona ha’u-nia meja leten, kompleta ho time-line, feramentu no orsamentu proporsitadu, parte legál sira mós sei partisipa atu avália proposta ne’e,” nia afirma.

Orientasaun primeiru-ministru no auditória interna

Prezidente Autoridade lembra katak ezekusaun no kontinuidade projetu ne’e bazea mós orientasaun husi Primeiru-Ministru, Kay Rala Xanana Gusmão, nu’udar entidade tuteladu no superentendente RAEOA nian, ne’ebé orienta ona atu halo auditoria interna no avalia kualidade obra nian.

“Ita kompromete atu parsériu ne’e bele kontinua, tanba tinan kotuk Primeiru-Ministru ba observa ona, no orienta atu kontinua karik, haree nia kualidade, signifika labele estagna tanba gasta ona osan Estadu besik millaun $10. Entaun sentru administrative ne’e tenke kontinua, tanba Governu mós presiza edifisíu ida atu konsentraliza serbisu hothotu,” nia hateten.

Iha parte seluk, Jestór Empreza Samhee Construction Ltd, Park Dae Ho, hateten katak ekipa téknika husi empreza hala’o ona enkontru koordenasaun ho Autoridade no prontu atu kumpre rekomendasaun hotu.

“Ami enkontru ona, ko’alia oinsá ba negosiasaun tuirmai, atu kontinua projetu ne’e, maibé ida-ne’e depende ba desizaun husi Autoridade RAEOA no kompañia nia preparasaun, entaun negosiasaun antes ne’e, Prezidente Autoridade husu atu buat hotu prepara didi’ak hodi hatama ba Autoridade RAEOA depois mak sei aprezenta fila-fali ba Primeiru-Ministru, tanba desizaun hotu tenke ba iha Primeiru-Ministru, neʼebé atu kontinua ou la’e, maibé rekomendasaun atu halo revizaun ba BoQ ami prontu no kumpre,” Park Dae Ho deklara.

Istória projetu no kondisaun atuál

Konstrusaun edifísiu sentru administrasaun ne’e lokaliza iha Bairru Santa Rosa, Aldeia Oésono, Suku Costa, Sub-rejiaun Pante Makasar. Projetu ne’e adjudika ba empreza Samhee Construction Ltd (husi Korea do Sul) ho valór kontratu hamutuk $10,900,033.37 (millaun $10.9), ne’ebé aloka husi Orsamentu Jerál Estadu (OJE) tinan-2016.

Ezekusaun kontratu foun ne’e hahú iha loron 1 Fevereiru 2017 ho prasu atu finaliza iha Agostu 2018, maibé obra ne’e estagna no abandona to’o ohin loron.

Observasaun direta husi jornalista Ajénsia TATOLI, I.P. iha terrenu nota katak, maske konstrusaun paradu, árkitetura no estutura edifísiu nian kontinua hetan protesaun ho lutu kalen (zinku) no hetan meiu seguransa rigoroza husi pesoál seguransa sívil sira.

Notísia relevante:Tribunál Oé-Cusse fó paresér ba SAMHEE halo manutensaun ekipamentu pezadu

Jornalista: Abílio Elo Nini

Editór: Rafael Ximenes de A. Belo