OEKUSI, 21 Janeiru 2026 (TATOLI) – Primeiru-Ministru (PM), Kay Rala Xanana Gusmão, kuarta ne’e, observa direta progresu fíziku konstrusaun ba futuru edifísiu administrasaun Rejiaun Administrativa Espesiál Oekusi Ambeno (RAEOA).
Notísia relevante:Tribunál Oé-Cusse fó paresér ba SAMHEE halo manutensaun ekipamentu pezadu
Konstrusaun edifísiu referidu, responsabiliza hosi empreza internasionál Samhee Construction Ltd, iha bairru Santa Rosa, aldeia Oesono, suku Costa, sub-rejiaun Pante Makasar, ne’ebé hahú konstrui iha 2017 maibé liu tiha tinan ida, iha 2018 abandona to’o ohin loron, no iha mandatu Autoridade RAEOA 2022 submete ona ba prosesu justisa iha tribunál Oekusi.
“Ami sei buka hatene uluk lai, tanbasá mak projetu ne’e seidauk hotu hela de’it, tinan barak ona, autoridade atuál iha ona planu no koordena ona ho empreza hodi kontinua, maibé ita haree nia tempu abandona kle’ur demais, orsamentu boot tebes, ne’ebé ha’u mai haree, ekipa ida sei mai atu husu no buka hatene,” Xefe Governu informa iha vizita ofisiál ba konstrusaun ne’e.
Notísia relevante:Empreza Samhee sei halo revizaun BoQ molok kontinua projetu edifísiu administrasaun RAEOA
Iha biban ne’e, Prezidente Autoridade RAEOA, Régio da Cruz Salu, hato’o katak antes ne’e empreza Samhee ho Autoridade Anteriór lori malu ba tribunál, maibé iha tinan kotuk Autoridade sesante inisía ona prosesu oinsá reativa fali no buka hatene kazu ne’e tanba saida.
Entaun prosesu la’o atu buka hatene prosesu legál sira atu-bele retoma fila-fali tanba uluk autoridade mak hatama kazu ne’e ba tribunál, ne’ebé prosesu hahú ona iha tinan kotuk to’o ona 50%.
“Foin dadaun ha’u tama ha’u kontinua prosesu ne’e tau prioridade duni, ita koordena ho empreza, sira mós konkorda halo omologasaun atu hasai kazu ne’e husi Ministériu Públiku no tribunál. Agora permite Governu liuhusi DRI no ADN atu halo inspesaun iha fulan ne’e, atu haree ba nia BoQ foun, atu haree saida mak nesesita, saida mak presiza hadi’a, maibé nia valór orsamentu labele bo’ot liu fali kontratu uluk, tanba projetu ne’e abandona tinan barak ona dezde 2028,” nia hateten.
Notísia relevante:Posibilidade, konstrusaun futuru edifísiu administrasaun Oekusi husi empreza Samhee hahú fali
Entretantu, konstrusaun ne’e konstrui Orsamentu millaun $10,900,033.37, ne’ebé autoridade RAEOA aloka mai-hosi Orsamentu Jerál Estadu (OJE) tinan-2016 ho no nia ezekusaun hahú iha loron 01 fevereiru 2017 ne’ebé tenke finaliza iha agostu 2018.
Tuir observasaun Ajénsia Tatoli,I.P, Primeiru-Ministru akompaña hosi Ministra Finansas, Santina José Rodrigues F. Viegas Cardoso, Ministru Administrasaun Estatál, Tomás do Rosário Cabral, Ministru Planeamentu no Investimentu Estratéjiku, Gastão Francisco de Sousa, Prezidente Komisaun Funsaun Públika (KFP), Agostinho Letêncio de Deus, Prezidente Autoridade RAEOA, Régio da Cruz Salu, Diretór Ezekutivu ADN, Januário M. Guterres no mós na’in bá empreza.
Jornalista: Abílio Elo Nini
Editór: Rafael Ximenes de A. Belo
