OEKUSI, 24 Novembru 2025 (TATOLI) –Diresaun Rejionál Infraestrutura (DRI) Rejiaun Administrativa Espesiál Oekusi Ambeno (RAEOA), rekomenda ba empreza internasionál Samhee Constructions Ltd, atu halo revizaun ba Bill of Quantity (BoQ) hodi kontinua projetu futuru edifísiu Administrasaun RAEOA.
“Prosesu edifísiu futuru administrasaun RAEOA nian ne’ebé konstrui husi empreza internasionál Samhee, oras ne’e daudaun husi Autoridade RAEOA liuhusi Diresaun Obra Públika hamutuk ho parte jurídiku, ita konklui ona enkontru ho empreza, atu-bele kontinua obra ne’e, maibé ita sei halo analiza, no ita mós rekomenda ona ba Samhee atu prodús revizaun BoQ, hafoin ita bele hamosu amandamen ou bele kontinua kontratu, depende desizaun legalidade husi jurídiku sira,” Diretór DRI Oekusi, Remígio Nuno Sila informa iha Oekusi, ohin.
“Ita kontinua hein. Espera Autoridade bele rezolve iha tempu-badak, maibé ha’u hanoin tanba sei iha prosesu negosiasaun liu-liu revizaun BoQ, hafoin husi parte jurídiku bele hamosu kontratu foun ou maneira oinsá, mak bele la’o tuir lei ne’ebé iha,” nia afirma.
Notísia relevante:Konstrusaun edifísiu administrasaun RAEOA iha faze komunikasaun ho Tribunál
Jestór Empreza Samhee Constructions Ltd, Park Dae Ho, informa, antes ne’e téniku husi empreza hala’o enkontru koordenasaun ho Autoridade, no promete sei kumpre rekomendasaun sira-ne’ebé hato’o husi Autoridade RAEOA nian.
“Ami enkontru ona, ko’alia oinsá ba negosiasaun tuirmai, atu kontinua projetu ne’e, maibé ida-ne’e depende ba desizaun husi Autoridade RAEOA no kompañia nia preparasaun, entaun negosiasaun antes ne’e, Prezidente Autoridade husu atu buat hotu prepara didi’ak hodi hatama ba Autoridade RAEOA depois mak sei aprezenta fila-fali ba Primeiru-Ministru, tanba desizaun hotu tenke ba iha Primeiru-Ministru, ne’ebé atu kontinua ou la’e, maibé rekomendasaun atu halo revizaun ba BoQ ami prontu atu kumpre,” nia dehan.
Notísia relevante:Posibilidade, konstrusaun futuru edifísiu administrasaun Oekusi husi empreza Samhee hahú fali
Entretantu, konstrusaun edifísiu administrasaun ne’e konstrui husi empreza Internasionál Samhee Construction Ltd, iha bairru Santa Rosa, aldeia Oésono suku Costa sub-rejiaun Pante Makasar, ho valór kontratu hamutuk millaun $10,900,033.37, orsamentu ne’e Autoridade RAEOA aloka husi Orsamentu Jerál Estadu (OJE) 2016 nian. Durante kontratu ba projetu ne’e kompañia hahú ezekuta iha loron 01 Fevereiru 2017 no tenke termina fulan-Agostu 2018.
Notísia relevante:Tribunál Oé-Cusse fó paresér ba SAMHEE halo manutensaun ekipamentu pezadu
Observasaun jornalista Ajénsia TATOLI, I.P, nota katak projetu ne’e, kontinua abandona maibé lutu halo metin ho kalen (zinku) no hetan seguransa másima husi seguransa sívil sira.
Jornalista: Abílio Elo Nini
Editór: Rafael Ximenes de A. Belo
