Aldeia Ritabou inisia limpeza jerál kada semana hodi kuída ambiente moos
MALIANA, 07 Agostu 2026 (TATOLI) – Lederansa komunutária aldeia Ritabou, suku Ritibou, postu administrativu Maliana, munisípiu Bobonaru, organiza komunidade hodi inisiasa atividade limpeza jeral kada semana atu mantein ambiente mos no saudavel.
Xefi Aldeia Ritabou, Nelson Araújo do Carmo, hatete katak atividade limpeza ne’e realiza bazeia ba inisiativa rasik husi komunidade, ho objetivu atu kuidadu ambiente no kondisaun ijiene iha aldeia.
“Ami organiza komunidade halo limpeza ne’e, tanba programa prioridade aldeia nia hafoin povu fó konfiansa mai ha’u iha eleisaun liubá. Entaun, ami hahú ho hamoos bee-dalan, atividade ne’e sei raliza semana-semana, depois semana oin, idaidak sei hamoos bee-dalan no du’ut iha uma-ninin. Sei hasai sirkulár ida hodi bandu komunidade soe lixu iha estrada publiku, bee-dalan”, nia informa ohin.
Sirkulár ne’e sei bandu mós atu fase motór no karreta iha kanál irrigasaun Maliana I. “Bee-dalan ne’e benefisia ba ema hotu uza hodi halo to’os, natar, no buat seluk tan. Bee ne’e importante tebes ba ema nia moris, tanba ne’e ita tenke kuidadu para ambiente ne’e bele di’ak, labele lori risku ba ita nia ai-han”, katak.
Aleinde ne’e, sei aviza komunidade atu labele kesi animál iha fatin públiku, liuliu iha estrada ninin tanba bele hamosu problema ba ambiente no seguransa utilizadór estrada.
“Foin lalais ita-nia Autoridade Munisípiu Bobonaru fó sai ona avizu atu labele husik animál iha fatin publiku, informasaun ida-ne’e ha’u espala ona ba sira”, dehan.
Notísia relevante: Suku Ritabou fó sansaun ba membru ne’ebé la partisipa iha komemorasaun 20 Maiu
Juventude aldeia Ritabou, Geordano Saldanha, louva inisiativa ne’e no promete sei kontinua partisipa ativa iha atividade referida hodi kontribui ba ambiente ne’ebé moos no saudavel.
“Ha’u hakarak konvida joven sira hotu iha Ritabou, mai ita hotu hamutuk kontribui ba ambiente moos, tanba saúde iha ita-nia liman rasik”, nia realsa.
Aldeia Ritabou nu’udar sentru husi aldeia 11 seluk ne’ebé eziste iha suku Ritabou.
Notísia relevante: PAM Bobonaro inisia hamoos lixu iha Maliana
Jornalista: Sergio da Cruz
Editora: Maria Auxiliadora
