EBF Faturui enfrenta problema infraestrutura no falta manorin
BOBONARU, 07 Agostu 2026 (TATOLI) – Eskola Báziku Filiál (EBF) Faturui, iha suku Leolima, postu administrativu Balibó, munisípiu Bobonaru, hasoru kona-ba infraestrutura eskolár ne’ebé aat no falta profesór, ne’ebé afeta ba prosesu ensinu-aprendizajen ba estudante sira.
Koordenadór EBF Faturui, Bento Xavier, hateten edifísiu eskola ho totál sala tolu mak la di’ak, balun nakfera no seluk piku monu ona tanba eskola ne’e harii dezde tinan 2012.
Aleinde ne’e, meza no kadeira ba estudante sira mós barak mak aat ona no la sufisiente.
“Durante feriadu eskolár, ami-nia sasan sira la seguru tanba muru protesaun laiha.Ema balun tama sobu eskola no livru balun mós lakon”, nia informa ba ohin.
Bento mós esplika katak EBF Faturui seidauk iha hariis-fatin no sintina ba estudante no profesór sira. Tanba ne’e, bainhira presiza ba nesesidade sanitaria tenke halai bá ai-laran. “Ami hanoin ida-ne’e la ijiene no bele fó risku ba saúde estudante sira-nia”, nia afirma
Aleinde ne’e, eskola ne’e mós seidauk iha dapur merenda eskolár. Durante ne’e, koziñeira sira prepara hahán iha nia uma rasik hafoin lori bá eskola mak fahe ba estudante sira konsumu.
EBF Faturui daudaun iha estudante hamutuk na’in-92, maibé manorin na’in-haat de’it.
Notísia relevante: Empreza tolu reabilita ona estrada rurál iha Faturui-Leolima
“Tanba limitasaun ne’e, klase primeiru to’o kuartu anu tenke hala’o ho sistema multiklase, enkuantu estudante klase kintu no sestu aprende ketak ho rekursu limitadu, maibé ami-nia ensinu-apredizajen kontinua la’o normál tuir manuál Ministeriu Edukasaun nian. Ami husu atu koloka tan profesór Bolsa Kandidatura mai tan iha ne’e”, nia dehan.
Reprezentante inan-aman estudante sira, Afonso Taibere Moniz, husu ba Governu atu tau atensaun ba nesesidade sira ne’ebé eskola enfrenta. “Ami, inan-aman, hein de’it intervensaun husi Estadu. Bainhira programa ruma mai, ami prontu atu simu no apoiu”, dehan.
Notísia relevante: EDTL sei instala eletrisidade iha Faturui Leolima
Jornalista: Sergio da Cruz
Editora: Maria Auxiliadora
