Empreza tolu reabilita ona estrada rurál iha Faturui-Leolima

BOBONARU, 06 Agostu 2026 (TATOLI) – Empreza lokál tolu implementa ona projetu reabilitasaun estrada rurál pakote I, II no III iha aldeia Faturui, suku Leolima, postu administrativu Balibó, munisípiu Bobonaru, ho totál distánsia kilómetru lima-resin.

Empreza tolu ne’e mak Crecendo Unipessoal Lda., Zavia Unip. Lda., no LNMoniz Unip. Lda.

Enjeñeiru empreza Crecendo, Januário dos Reis, dehan serbisu fizíku to’o ona faze halo bee-dalan no muru. “Progresu fizíku ba implementasaun obra ne’e agora 15%, ba item masonry ou saluran nia atinje 75%. Ba oin saluran ne’e hotu ami sei tama ba ateru hotu mak foin tama ba plum”, nia dehan.

Implementasaun obra ne’e la’o durante fulan tolu no enjeñeiru ne’e observa katak atividade hotu-hotu la’o ho di’ak, tanba maioria komunidade no líder komunitáriu sira koopera ho empreza.

“Sira mai fó hanoin ami, depois ami mós sempre rona sira tanba projetu ne’e implementa iha sira-nia suku. Ami fiar obra ne’e bele finaliza tuir nia tempu másimu tinan ida”, nia garante.

Iha sorin seluk, komunidade Faturui, Reinato Mau Sebastião, konsidera obra ne’e responde ba ezijénsia povu nian ba infraestrutura bázika durante tinan 20-resin.

Nia dehan estrada ne’e bele fasilita movimentasaun komunidade nia ba atividade ekonómika, saúde, sosiál no seluk tan.

“Agora, iha ne’e moras ruma karik ambulánsia mai besik ami, tanba estrada ne’e tama to’o ami-nia aldeia no bairru, ami sente buat hotu besik mai ami, tanba eletrisidade mós agora Governu tau ona ai-riin, la kle’ur tan ahi-lakan ona”, nia dehan.

Aleinde ne’e, komunidade Afonso Taibere Moniz kontente tanba Governu bele lori dezenvolve to’o nivel aldeia.

Nia argumenta katak bainhira obra ne’e finaliza bele hakmaan naha-todan ne’ebé durante tinan barak sira hulan tanba estrada ne’e asesu husi rurál bá to’o postu administrativu no munisípiu.

Notísia relevante: EDTL sei instala eletrisidade iha Faturui Leolima

“Uluk liu, ami susar la halimar, presiza buat ruma atu lori bá merkadu mós leba de’it. Agora ne’e kapa’as tebes, sasán todan karreta mak lori ona, osan mak manda de’it”, nia dehan.

Estrada ne’e ho totál pakote tolu, pakote I ezekuta husi Cresendo Unip., Lda., ho valór orsamentu $372.437.08, Zavia Unip., Lda., ho montante $345.803.49, no LNMoniz Unip., Lda., $301.787,70. Tuir kontratu, data remata ba obra ne’e iha fulan-Abríl tinan 2027.

Notísia relevante: Autoridade Bobonaro no komunidade kuda ai-oan iha Leolima

Jornalista: Sergio da Cruz

Editora: Maria Auxiliadora