EUA no ASEAN husu libertasaun inkondisionál ba Aung San Suu Kyi
DILI, 07 Agostu 2026 (TATOLI) – Departamentu Estadu EUA nian no prezidente hosi Asosiasaun Nasaun sira Sudeste Aziátiku nian iha loron-sesta (7 Agostu) repete sira-nia apelu ba libertasaun inkondisionál hosi eis-líder detidu Miánmar nian, Aung San Suu Kyi no dadur polítiku sira seluk.
Iha loron-segunda, Aung San Suu Kyi hasoru malu ho reprezentante ida hosi Komité Internasionál Cruz Vermelha nian hafoin tinan barak nia laran ho pergunta sira kona-ba nia saúde no moris-di’ak hafoin nia detensaun iha golpe Estadu ida iha fulan-Fevereiru 2021 ne’ebé hasai governu sivíl eleitu ida ne’ebé lidera hosi nia.
Iha deklarasaun ketak sira, Departamentu Estadu no prezidente ASEAN simu ho laran-haksolok vizita ICRC nian no hatete katak sira hein katak ida-ne’e hanesan inísiu hosi asesu regulár, inklui ba kuidadu médiku, ba manan-na’in Prémiu Nobel Dame nian ho tinan 81.
“Ami husu atu habelar liután asesu ba ema sira ne’ebé maka iha detensaun iha Miánmar dezde Fevereiru 2021, no repete ami-nia apelu ba sira-nia libertasaun, inklui libertasaun kompletu no inkondisionál ba Aung San Suu Kyi,” Prezidente ASEAN nian hatete liuhusi nota imprensa.
Iha post ida kona-ba X, Departamentu Estadu nian hatete: “Ami hein katak vizita ne’e marka inísiu hosi asesu umanitáriu regulár ba Aung San Suu Kyi no serve hanesan dalan ida ba asesu boot liu ba prizioneiru polítiku sira hotu no husu ba nia “libertasaun imediata no inkondisionál.”
Departamentu Estadu mós husu ba militár Miánmar nian atu halo diálogu hodi hakotu konflitu ne’ebé mosu hafoin golpe Estadu.
Prezidente ASEAN nian reafirma papél hosi enviadu espesiál bloku nian hodi envolve parte hotu-hotu iha Miánmar tuir planu dame nian hosi Konsensu Pontu Lima hosi ASEAN.
Nia hein atu enviadu espesiál hetan asesu hodi vizita Miánmar no hasoru parte sira hotu ne’ebé iha interese, inklui Aung San Suu Kyi.
Notísia relevante: Miánmar hala’o Eleisaun Jerál, Aung San Suu Kyi sei iha kadeia
Fonte: CNA
