Projetu reabilitasaun estrada Lourba-Atsabe no Lolotoe hein de’it vistu tribunál

BOBONARU, 08 Agostu 2026 (TATOLI)—Ministru Obra Públika, Samuel Marçal, hateten projetu reabilitasaun estrada Lourba, Postu Administrativu Bobonaru liga ba Atsabe to’o Letefoho-Ermera no pakote segundu estrada Loloto’e Vila tama hotu ona iha prosesu finál, tanba hein de’it vistu husi tribunál de kontas atu bele kontinua ba faze tuir mai hodi selebra kontratu ho empreza manan-na’in Sanghay Construction Co. Ltd, no Jiangsu Ruiwo Construction Co. Ltd

Samuel Marsal hateten, projetu reabilitasaun estrada trosu Lourba-Atsabe to’o Letefoho no Loloto’e kuaze fulan hitu ona hein vistu tribunál. Estrada trosu Lourba-Atsabe ho distansia Kilómetru 48,93 ne’ebe sei implementa ho valór orsamentu milaun $43,1-resin no trosu Loltoe ho distánsia kilómetru 8,9 no orsamentu millaun $11,9.

Notísia Relevante: Estrada Kailaku-Lolotoe iha faze aprovizionamentu finál, Lourba-Atsabe hein implementasaun

“Estrada husi Lourba ba Atsabe to’o iha Letefoho ne’e mós kuaze finál ona, hein de’it tribunál atu fó vistu iha ne’ebá kuaze besik fulan hitu ona. Depois pakote segundu estrada husi Bobonaru-Loloto’e ne’e mós hanesan hein de’it tribunal atu fó vistu, iha ne’ebá kuaze fulan neen ka hitu ona,” Ministru Samuel Marcal hato’o nia intervensaun iha serimónia lansamentu estrada urbana Kailaku, ohin

Ministru ne’e hatutan, projetu reabilitasaun estrada Lourba-Zulo mós tama ona iha prosesu finál, inklui estrada Santa Cruz-Maliana ba Oe-Leu.

Nia esplika, Governu espera katak hafoin halo inaugurasaun estrada iha Maliana Vila fulan hirak liubá, iha Dezembru tinan ne’e sei halo tan inaugurasaun ba trosu Batugade-Balibo tanba kompañia konstrutora promete ona sei finaliza molok tinan 2026 termina.

Implementasaun projetu sira-ne’e la’ós servisu husi Ministériu Obra Públika mesak, maibé hetan apoiu husi Primeiru-Ministru, Kay Rala Xanana Gusmão, KAFI, deputadu sira, diretór jerál sira, Ájensia Nasionál Dezenvolvimentu no entidade relevante sira.

Ida-ne’e ho objetivu atu hadi’a asesu transporte no fasilita koneksaun estre komunidade iha área fronteira no zona rurál iha Munisípiu Bobonaru inklui hadi’a mobilidade komunidade no apoia atividade ekonómika.

“Orientasaun primeiru Ministru nian loro-loron sempre husu relatóriu to’o iha ne’ebé, hatudu katak PM tau atensaun ba fatin sira-ne’e.

“Ita hotu hatene katak iha trosu sira-ne’e la’ós foin mak ’at lae, maibé barak liu iha estrada tempu Portugés balun seidauk halo to’o agora, balun iha tempu Indonezía to’o ukun-an, ita foin mak hahú atu hadi’a estrada aat sira-ne’e,” nia dehan.

Kona-ba estrada, Ministru Samuel akresenta Governu atuál foin hala’o mandatu tinan tolu, maibé konsege finaliza eletrifikasaun iha nivel suku hotu iha 2025 ho totál 163 suku kompletu ona.

Ba tinan 2026, Governu espera bele kompleta eletrifikasaun ba aldeia 193 iha meadu tinan 2027.

“Konkursu públiku ba projetu sira hotu ona, no Governu espera kompañia sira bele aselera implementasaun, ho balun bele ramata iha Dezembru no balun seluk iha meadu 2027,” nia dehan.

Prezidente Autoridade Munisípiu Bobonaru, Paulo Moniz Maia, reforsa katak Munisípiu Bobonaru identifika ona estrada nasionál, urbana, munisipál no rurál ne’ebé presiza reabilitasaun iha tinan sira oin mai.

Nesesidade reabilitasaun estrada sira-ne’e inklui ona iha Planu Estratéjiku Dezenvolvimentu Munisipál (PEDM) 2026-2030, kompostu husi Estrada nasionál iha totál distánsia kilómetru 131, estrada munisipál kilómetru 48 no estrada rurál hamutuk kilómetru 444.

“Husi totál hirak iha leten estrada kategoria nasionál sei diminui tan tanba iha projetu On-Going ida trosu Batugade-Balibo ho distaásia kilómetru 12,98. Husi ida-ne’e ita sei falta kilómetru 158,2 husi totál kilómetru 171 identifikadu atu halo. Númeru ida-ne’e sei tun tan wainhira trosu Maliana Lourba-Atsabe no trosu Oe-Leu-Loloto’e no trosu Maliana-Kailaku hahú tan ohin, totál ida-ne’e bele reduzidu sai menus liután,” nia dehan.

Antigu deputadu ne’e fundamenta, Diresaun Servisu Munisipál Obra Públika Bobonaru mós halo ona levantamentu dadus kona-ba trosu Tunubibi-Korluli no Maliana-Utedai, ne’ebé espera bele implementa iha tinan ida-ne’e ka tinan oin mai.

Ba estrada rurál, Munisípiu Bobonaru identifika totál projetu hamutuk 39 pakote. Husi projetu sira-ne’ebé on-going, kilómetru 103,88 bele konsidera ramata, enkuantu kilómetru 333,16 sei presiza reabilitasaun.

Nia dehan, Autoridade Munisípiu Bobonaru sei kontinua koordena ho Governu sentrál no entidade relevante sira atu aumenta implementasaun projetu estrada rurál iha tinan ida-ne’e no tinan sira oin mai, ho objetivu atu kompleta gradualmente estrada sira-ne’ebé presiza halo reabilitasaun.

Enkauntu estrada hirak ne’ebé remata sei fó benifísiu ba komunidade maior-parte ho totál 132,547 abitantes mai husi Suku 50 no Aldeia 193.

Notísia Relevante: Xanana lansa projetu reabilitasaun estrada Maliana-Kailaku 26Km

Jornalista : Sergio da Cruz

Editór:       : Cancio Ximenes