Eziste tinan 11, AHDRO haree mudansa asesibilidade ba EhD iha Bobonaru
BOBONARU, 14 Agostu 2026 (TATOLI)- Asosiasaun Halibur Defisiénsia Rejiaun Oeste (AHDRO) selebra aniversáriu ba da-11 nu’udar organizasaun ida ne’ebé luta ba direitu ema ho defisiénnsia iha Bobonaru nounisípiu seluk tan.
Diretór-Ezekutivu AHDRO, Sebastião de Fátima, hatete AHDRO nia ezisténsia durante tinan 11 halo advokasia no sensibilizasaun ba autoridade lokál no komunidade atu respeita no valoriza dignidade ema ho defisiénsia. Husi esforsu hirak ne’e haree katak mudansa iha asesibilidade ba ema ho defisiénsia iha edifísiu públiku no instalasaun públika hanesan estrada Maliana Vila.
Nia realsa katak mudansa ne’e seidauk 100%, maibé autoridade sira komesa tau konsiderasaun ba advokasia kona-ba inkluzaun sosiál ne’ebé AHDRO halo durante ne’e.
Notísia relevante: AHDRO preukupa edifísiu Autoridade Bobonaru laiha asesiblidade ba EhD
“Husi ita-nia ezisténsia ne’e haree iha mudansa, hanesan edifísiu públiku balun iha ona asesibilidade ka rampa, inklui edifísiu agrikultura no sede suku sira, no fasilidade públiku seluk tan”, Sebastião dehan ba jornalista sira, iha edifísiu ADHRO, Tunubibi, sesta-feira ne’e.
Tuir nia, AHDRO harii iha 10 Agostu 2015 ho vizaun no misaun atu luta ba direitu ema ho defisiénsia, liuhusi programa advokasia, formasaun, ortikultura, kuda-modo, formasaun letra Braille no sensibilizasaun kona-ba inkluzaun sosiál.
Nia dehan durante ezisténsia AHDRO hasoru dezafíu barak, liuliu iha rekursu umanu, finanseiru no seluk tan, maibé nafatin kolabora ho instituisaun relevante, parseiru no organizasaun sosiedade sivíl sira atu firme luta ba direitu ema ho defisiénsia, liuliu asesu ba edukasaun, saúde no oportunidade seluk tan.
Sebastião hatutan AHDRO durante ne’e hetan apoiu husi Governu Austrália liuhusi ADTL ba konstrusaun edifísiu AHDRO no sentru formasaun, no kontinua koordena ho Ministériu Solidariedade Sosiál kona-ba atividade sira relasiona ho ema ho defisiénsia.
AHDRO rejista ona ema ho defisiénsia hamutuk 680, kompostu husi ema ho defisiénsia matan, fizika, mentál no komunikasaun. Husi totál dadus ema ho defisiénsia iha munisípiu Bobonaru liu 3.000.
Fundadór AHDRO, Gaspar Afonso, hatete organizasaun ne’e harii ho objetivu atu sai lian ba ema ho defisiénsia no luta hasoru stigma no diskriminasaun tanba EhD barak sei moris iha vunerabilidade no seidauk goza direitu nakonu.
Nia husu parte hotu atu kontinua apoia ema ho defisiénsia, liuliu iha asesu ba edukasaun, saúde no asesibilidade.
Gaspar mós enkoraja membru AHDRO, juventude no ema ho defisiénsia atu kontinua aprende no dezenvolve kapasidade atu kontribui ba dezenvolvimentu Bobonaru no Timor-Leste.
“Ita halibur-malu, la’ós han-toba de’it, depois fila bá uma. Ita mai sai husi uma, ita ho bote-mamuk, mais ou menus ita fila bá uma, família, viziñu, komunidade ita lori netik buat ruma”, nia dehan.
Reprezentante Diretór Asosiasaun Hadomi Defisiénsia Matan Timor-Leste (AHDMTL), Luciano Borges, dehan asosiasaun kontinua kolabora ho AHDRO atu promove no reforsa organizasaun ema ho defisiénsia iha Bobonaru.
“Ami-nia serbisu hamutuk atu lori ema ho defisiénsia asesu ba edukasaun, tanba liuhusi edukasaun mak ita bele lori ita nia-an ba mundu no lori mundu mai ita nia-an”, Luciano afirma.
Nia hateten, AHDMTL no AHDRO kolabora iha suku 20, eskola lima, no liuhusi Rádiu Komunidade Balibó no Rádiu Komunidade Maliana fahe informasaun kona-ba direitu no inkluzaun ema ho defisiénsia.
AHDRO hala’o atividade komemorasaun aniversáriu ba da-11 ho migsa agradesimentu, fahe istória kona-ba ezisténsia organizasaun, fó sertifikadu apresiasaun ba membru sira no kolleta modo iha área AHDRO.
Notísia Relevante: AHDRO husu sidadaun hotu iha Bobonaro respeita Ema ho Defisiénsia
Jornalista: Sergio da Cruz
Editora: Maria Auxiliadora
