SEDL lansa fatuk dahuluk ba projetu konstrusaun postu saúde no rezidénsia pesoál médiku iha Usecai
KOVALIMA , 14 Agusto 2026 ( TATOLI)- Sekretáriu Estadu Dezenvolmentu Lokál, Mateus dos Santos W. Talo, akompaña husi Sekretáriu Administrasaun Planu Integradu Dezenvolvimentu Munisípiu, Caetano dos Santos Ribeiro, hamutuk ho Diretór Servisu Munisipál Saúde, Diretór Programa Nasionál Dezenvolvimentu Suku no Diretór Planu Dezenvolmentu Munisipál lansa fatuk dahuluk konstrusaun postu saúde no rezidénsia pesoál médiku, iha Aldeia Dula, Suku usecai, Postu Administrativu Zumalai, Munisípiu Kovalima.
Ita hahú lansa hodi halo konstruisaun postu saúde no rezidénsia ba médiku sira tanba durante ne’e ita-nia komunidade defisil atu asesu postu saúde,” dehan Sekretáriu Estadu Dezenvolvimentu Lokál ba jornalista sira, iha iha Suku Usecai, ohin.
Suku Usecai suku ne’ebé izoladu iha postu administrativu Zumalai,difisil atu asesu saúde no difislil atu lori produtu lokal ba merkadu iha tempu udan.
Notisia relevante:Fundu Globál apoiu millaun $12 ba konstrusaun sentru saúde Ermera
Ho nune’e, XI Governu Konstituisionàl ne’ebé lidera husi Primeiru Ministru Kay Rala Xanana Gusmão, husi Ministériu Administrasaun Estatal liuhusi programa Dezenvolmentu Munisipál (PDIM),hahú lansa fatuk dahuluk hodi konstrui postu saúde no rezidénsia ba médiku sira iha Suku Usecai.
Ho konstrusaun postu saúde no estrada ida-ne’e bele fasilita ona komunidade sira atu asesu saúde no lori sira-nia produtu lokál ba iha merkadu.
Iha biban hanesan, Sekretáriu Administrasaun Munisípiu PDIM, Caetano dos Santos Ribeiro,konstrui postu saúde no rezidénsia ba médiku prosesu ne’e proposta mai husi xefe Aldeia hafoin aprezenta iha reunian Asembleia Postu Administrativu (ASPA).
“ Ita hahú konstruisaun ona postu saúde importante mak ita tenke unidade nune’e kontinua hala’o Dezenvolvimentu iha Suku,”nia dehan.
Entertantu, Diretór servisu Saúde Munisípiu Kovalima, Domingos Sequeira, dehan Konstrusaun postu Saúde, iha Suku Usecai la prenxe kritériu saúde, maibé tanba komunidade halo viajen dook atu asesu postu saúde, nune’e halo konstrusaun atu bele hakbesik saude ba komunidade sira.
Bazeia ba regra husi Ministériu Saúde bainhira atu konatrui postu saúde tenke iha populasaun 1.500,maibé iha ne’e 200 de’it.
“ Ita konstrui postu saúde, tanba ita boot sira tama iha kritéria tanba ita bo’ot sira dook atu asesu postu saúde nune’e bele koloka ona pesoál saúde sira atu halo atendementu, nune’e ita-boot presiza koopera ho Governu,” nia esplika.
Komunidade Paulino Cardas sente kontente tanba XI governu konstrusaun bele reponde ona komunidade nia preokupasaun ne’ebé durante la asesu ba estrada ahi no postu saúde.
“Ukun husi XI Governu Konstituisionàl bele responde ona ami nia preokupasaun mak hanesan la asesu ba estrada,postu saúde no ahi bele rezolve ona.Ami komunidade presiza mak ida ne’e de’it”nia informa.
Empreza Titor Unpesoal Lda garante kualidade projetu
Diretór Empreza Titor Unpesoal Lda, Carel Capri, dehan nia parte garante kualidade ba projetu konstrusaun postu saúde no rezidénsia ba médiku, liuliu finaliza bazeia ba konstratu ne’ebé mak asina ho Governu.
“Ha’u garante katak empreza sei finaliza projetu konstrusaun bazeia ba konstratu ne’ebé mak empreza asina ona ho Governu,” nia garante.
Projetu postu saúde no rezidénsia pesoál médiku ne’e konstrui husi empreza Titor Unipesoal Lda ho total orsamentu hamutuk $404,592.05, Projetu ne’e servisu iha 10 jullu no remata iha 31 Dezembru 2026.
Notisia relevante:Ezekusaun orsamentu kapitál dezenvolvimentu ba projetu 2603 atinje 29%
Jornalista:Celestina Teles
Editór: Florencio Miranda Ximenes.
