Ekipa MOP-ADN destrui morru protesaun ba reabilitasaun estrada Luka liga bá Lakluta
VIKEKE, 20 Agostu 2026 (TATOLI)—Ekipa konjuta husi tékniku husi Ministériu Obra Públika (MOP) hamutuk tékniku husi Ajénsia Dezenvolvimentu Nasionál, Institutu Públiku (ADN, I.P.) deside halo destroisaun ba morru protesaun no ezgotu balun iha Luka liga bá Lakluta (Vikeke) tanba materiál ba konstrusaun la prenxe espesifikasaun iha kontratu.
Koordenadór Infraestrutura Destakadu Ministériu Obra Públika (MOP) Munisípiu Vikeke, Mário Ângelo Menezes, haktuir desizaun sobu morru protesaun no ezgotu tanba empreza implementadór la tuir espesifiasuan téknika liuliu ba mistrusaun rai-henek kontaminadu ho fatuk barak liu.
“Entaun ami hamutuk ho ADN deside sobu obra hodi nune’e fó hanorin ba ita-nia empreza sira, atu bá-oin servisu nafatin tuir espesifikasaun tékinika nian. Antes ne’e, ami fó uluk karta xamada dahuluk, daruak no to’o xamada datoluk ita-nia empreza nafatin la halo mudansa. Tan ne’e, ami tenke deside sobu nune’e empreza bele hadi’ak liután sira-nia servisu,” Mário Ângelo ba TATOLI iha Postu Vikeke Vila, Kinta ne’e.
Mário klarifika sira sobu mak Stone Masonry Line Drain (saluran) ho naruk metru 20 parte loos no Stone Masonry Retaining Wall (tembok penahan) ho naruk metru 11 iha parte karuk. Hafoin ne’e empreza konstrui filafali bazeia ba espesifikasaun.
Projetu rehabilitasaun estrada Luka Raihun–Lakluta Dilor, Sta. 0+000–7+000 (Pakote I), implementa husi empreza KIMBERLIE CONSTRUCTION Unipesoál, Lda, ho montante kontratu $4.000.215,67, númeru kontratu SSS/135/MOP-2025.
Jornalista: Vitorino Lopes da Costa
Editór: Xisto Freitas da Piedade
