Família no sarani realiza misa agradesimentu ba ordenasaun Padre Amos Martins Tavares

BOBONARU, 22 Agostu 2026 (TATOLI) –Família no sarani sira realiza misa agradesimentu ba Ordenasaun Saserdotál Pe.Amos Martins Tavares no Selebrasaun tinan Estasaun Misionariu Marobo selebrasaun ne’e nu’udar momentu importante ba Padre Amos Tavares hahú nia dalan foun nu’udar amu-lulik, hafoin simu ordenasaun ho kompromisu atu servi sarani no komunidade tuir lema ordenasaun “Deus Providensia”.

Paroku Pro-Katedrál Maliana, Padre Valerio Gusmão Lesu, iha omília misa agradesimentu ne’e dehan lema ordenasaun Pe Amos nian la’ós deit liafuan ne’ebé hakerek iha kartaun rekordasaun, maibé sai husi fiar no kompromisu kle’an ida atu lori nia moris tomak iha servisu Maromak.

Notísia Relevante:Amu-lulik sira iha Dioseze Maliana renova promesa saserdotál

“Maromak fó ona ba imi, komunidade Marobo, amu-lulik foun ida ho ni lema ‘Deus Providensia’ ne’e la’ós liafuan mamuk, maibé sai husi nia fiar no kompromisu perbétua ba nia moris vokasaun amu-lulik nian” dehan Padre Valerio iha Marobo, Sabadu ne’e

Nia hateten katak mundu ohin loron sei hasoru dezafiu barak, inklui ema kiak, familia ne’ebé fahe malu, ema ne’ebé lakon esperansa no sira ne’ebé sente mesak. Tanba ne’e, maromak bolu amu-lulik ne’e atu sai instrumentu Kristus nian hodi lori naroman, dame no esperansa foun ba sarani no ema hotu ne’ebé presiza.

“Kristu bolu ita-bo’ot atu lori naroman ida ne’e,iha o nia kaba’as kristu tula ninia poder,iha o nia kaba’as kristu tula ninia kbi’it la’os o atu ukun ho kbi’it mundu nia,maibé atu lori dame,hamaran matan been no fó esperansa foun ba ema sira ne’ebé la’o sala-dalan”Nia dehan

Padre Valerio mós hamutuk hato’o mensajen ba Pe Amos katak bainhira nia hasoru servisu pastorál ne’ebé todan, tenke nafatin hanoin nia lema ordenasaun, “Deus Providensia”, tanba Maromak ne’ebé bolu nia sei la husik nia la’o mesak.

Nia husu Pe Amos atu nafatin moris ho haraik-an, pasiénsia no domin, no besik nafatin sarani sira.

“Bainhira o sente kole no baruk, fiar katak Maromak sei fó pasiénsia. Bainhira o hasoru dezafiu no sente tauk, fiar katak Maromak sei fó matenek. Sai nafatin amu-lulik ida ne’ebé haraik-an, pasiénsia no hatene rona sarani sira,labele aprende buat ida istilu hirus, horon nafatin Bibi sira nia-I’is, sarani sira ne’e, tama dala ida iha sira nia leet, misa hotu tia vizita ida rua, depo’is hemu Kafé tia mak ba liu, momentu-momentu tur hamutuk minutu ida de’it mós sira konta ita nia di’ak”Nia Fó hanoin

Ba sarani sira, Padre Valerio, kompromote la husik Pe Amos la’o mesak iha nia servisu pastorál, maibé kontinua apoia nia ho orasaun no partisipasaun ativa iha atividade Igreja nian.

Nia subliña katak prezente boot liu ne’ebé komunidade bele fó ba amu-lulik foun mak orasaun, atu nia nafatin fiel ba nia promesa, forte iha fiar no kontente iha servisu Maromak nian.

Iha oportunidade ne’ebé hanesan, Vigáriu Parókia Imaculada da Conceição Bobonaru, Padre José Henrique, hateten katak Pe Amos mos hatene di’ak liu kona-ba muzika no durante nia formasaun sai nu’udar ema ida ne’ebé kontribui iha área muzika ba Dioseze sira iha Timor-Leste.

Tuir nia, Pe Amos hahú aprende muzika husi nia aman no hahu interesadu atu toka órgan antes tama iha semináriu. Experiénsia ne’e, tuir Padre José Henrique, sai parte ida husi dalan ne’ebé lori nia to’o realiza nia vokasaun no sai amu-lulik.

“Padre Amos hanesan maestro muzika ida ba Dioseze tolu iha Timor-Leste. Nia aprende muzika nia aman husu ha’u hanorin nia toka, depois kontinua dezenvolve nia talentu iha semináriu, ohin loron nia sai amu lulik ita Marobo oan orgulu”Amu lulik Marobo-Oan ne’e haktuir

Entretantu biban ne’e Pe Amos Tavares agradese ba familia, amu-lulik sira, sarani no parte hotu ne’ebé fó apoiu morál no materiál durante nia prosesu estudu no formasaun to’o nia konsege realiza nia mehi sai amu-lulik no dadaun ne’e hala’o kna’ar iha Igreja Imaculada da Conseição Bobonaru.

“Ha’u agradese tebes ba familia, amu-lulik sira no sarani hotu ne’ebé apoia ha’u, tantu moral no materialmente, husi ha’u nia estudu tomak to’o ha’u bele sai amu-lulik” dehan Pe Amos

Inan husi Pe Amos, Jermana Martins, haktuir katak bainhira nia oan sek ki’ik, nia la hatene katak Pe Amos sei hili dalan vokasaun amu-lulik tanba sei aprende toka muzika. Maibé Nia rekorda katak iha momentu ida, bainhira Pe Amos sei ki’ik, nia sente hanesan Maromak bolu nia oan atu ba servisu Igreja nian.

“Ami ba reza fó amu lulik sira, iha kinta pergama, ha’u hakat mai portaun ami hela ne’e, ha’u hakat ba dala-tolu nia,lian ida husi leten mai hatete hanesan ne’e, Ki’ik-Oan sira ne’e ida o tenke ser fó ha’u, mais ha’u la saida, ha’u dehan ka resposta de’it ki’ik-oan sira mak ne’e ita-bo’ot mak hili ida ne’ebé ita-bo’ot hakarak, dep’ois ha’u ba uma,lahaten hanesan buat ida ita la sadar, maibé ha’u la haluha, to’o ikus ba nia atu sai Diakonu mak ha’u dehan ai jesus ita-bot nia lian mai husi leten ne’e, ita-bot bolu ona mak ne’e, hau intrega ona ita bo’ot mak kuidadu nia, atu nia tuir ita nia hakarak”Tenik Jermana

Alende ne’e, aman husi Pe Amos, José Tavares, dehan nia no familia kontente no orgullu tebes tanba, maski mai husi familia simples, nia oan bele realiza vokasaun no sai amu-lulik.

“Dalan atu sai amu-lulik la fasil, tenke iha fiar no pasiénsia. Ha’u kontente no orgullu tebes tanba oan bele fó rezultadu di’ak ba familia no agora sei ba servi sarani sira ho domin” nia dehan

Pe Amos Simu Ordenasaun Saserdotál hosi Bispu Dioseze Maliana, Dom Norberto do Amarál iha lorom 30 fulan janeiru tinan 2026.

Notísia Relevante:Diákonu na’in-rua iha Dioseze Maliana ordenadu sai amu-lulik

Jornalista: Sergio da Cruz
Editora: Florencio Miranda Ximenes