iklan

BOBONARO, MUNISÍPIU

Diákonu na’in-rua iha Dioseze Maliana ordenadu sai amu-lulik

Diákonu na’in-rua iha Dioseze Maliana ordenadu sai amu-lulik

Bispu Dioseze Maliana, Dom Norberto do Amarál ,fó ordenasaun Saserdotál ba Diákonu na’in-rua hodi sai amu-lulik. Imajen Tatoli/Sérgio da Cruz.

BOBONARO, 13 maiu 2024 (TATOLI)-Bispu Dioseze Maliana, Dom Norberto do Amaral, segunda ne’e fo ordenasaun saserdotál ba Diákonu na’in-rua hanesan Zacarias Amaral Soares no Mouzinho Madeira Guterres Araújo, sai amu-lulik hodi serbí sarani sira.

Serimónia ordenansaun saserdotál ne’e sasin husi Bispu Dioseze Baucau, Dom Leandro Maria Alvez no Reprezentante Santa Sé iha Timor-Leste, Monsinor Marcco Esprizze.

Iha omília, Dom Norberto husu ba Amu-Lulik foun na’in-rua atu hatudu ezemplu di’ak, fiar-aan, laran moos, haraik-aan no fiar-metin ba vertude sira hodi la’o ba oin.

Tuir Dom Norberto, atu hala’o didi’ak kna’ar presbíteiru ne’e, padre foun na’in-rua tenke fiar ba Maromak, pureza no umildade nune’e bele la’o tuir vokasaun Maromak nia hodi haklaken evanjellu ba sarani sira.

Notisia relevante: Frater na’in-haat simu ordenasaun diakonál iha Maliana

“Ohin imi simu ordenasaun, simu mós moris foun ida-ne’ebé transforma diákonu sai ba Padre, ne’ebé sakramentu orden konsagra imi atu sai na’in Maromak nia atan ida, hodi serbí ho laran moos,” nia hateten iha Igreja Pro Katedrál Maliana

Prezidente Konferénsia Episkopál Timorense ne’e hatutan, atu sai servidór neʼebé di’ak tenke haraik-aan hodi buka halo tuir de’it buat-ne’ebé Maromak nia hakarak.

“Hodi lori moris tuir loloos dalan neʼebé imi atu hala’o iha imi-nia moris loro-loron, hala’o didi’ak ba hodi lori moris ne’e didi’ak tuir Maromak nia hakarak,” nia katak.

Reprezentante Família Padre Ordenadu na’in-rua, Lucio Amaral Gomes, hateten família laiha mutin no mean atu saran ba Maromak, maibé só bele saran de’it sira-nia oan-mane na’in-rua ba Dioseze Maliana hodi serbí igreja no sarani sira.

“Ohin, ita-boot na’in-rua sai família boot Dioseze Maliana ninian, tanba ne’e serbí komunidade, sarani tomak sai hanesan sasin ba Jesus nia laran luak, laran domin na’in nian,” nia hateten.

Família garadese aman Maromak neʼebé haraik domin no grasa, ba Bispu Maliana no amu-lulik sira hotu ne’ebé durante ne’e dedika sira nia-aan hodi forma Pé Zacarias ho Pé Mouzinho hahú husi semináriu Menor to’o ohin loron hetan ordenasaun hodi integra ba Ministériu Presbíteru.

“Ami hasa’e ba ita-boot nia liman, hodi haruka sira rua ba servisu iha to’os ne’ebé ita-boot prepara hela, iha Dioseze Maliana, ita boot mak uvas hún iha Dioseze Maliana, sira na’in-rua mak uvas ninia sanak neʼebé maka haklaken no haburas ita-boot ninia mensajen ba komunidade,” nia katak.

Biban ne’e, Padre Zacaria Amarál Soares, rekonese ohin loron iha altar santu hodi simu ordenasaun presbíteru, mai hosi dedidkasaun amu-lulik no desente sira hotu.

“Ami husu imi hotu nia orasaun mai ami na’in-rua, hare ami besik ba nakukun no ba rai-naruk, dada fali ami atu nune’e ami labele sidi no monu ba rai-naruk, imi sai nia anju da guarda moris loro-loron nia, hodi ami hala’o kna’ar ministeriál ida-ne’e hamutuk ho imi,” Padee Zacarias hakotu.

Notisia relevante: Amu-lulik sira iha Dioseze Maliana renova promesa saserdotál

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!