Timor-Leste rejista défisit komersiál millaun $92,4 iha Jullu
DILI, 24 Agostu 2026 (TATOLI) – Timor-Leste rejista défisit komersiál millaun $92,4 iha fulan-Jullu 2026, ne’ebé rezulta husi importasaun ho valór millaun $95.862.419,99 no esportasaun ho de’it millaun $3.467.875,48.
Tuir dadus husi Institutu Nasionál Estatístika Timor-Leste, Institutu Públiku (INETL, I.P), iha relatóriu mensál Estatístika Komérsiu Merkadoria Esternu nasaun rejista iha fulan-Jullu ne’e importasaun ho valór millaun $$95,86, ne’ebé husi montante ne’e $90.982.617,53 korresponde ba sasán, enkuantu millaun $4.879 ba importasaun la’ós sasán ne’ebé klasifika hanesan komérsiu. Ida-ne’e refere ba produtu sira destina ba misaun Nasaun Unida nian.
Iha períodu hanesan, valór esportasaun Timor-Leste nia atinje $3.467.875,48, ne’ebé inklui reesportasaun ho valór millaun $113,7 no esportasaun millaun $3,4.
Tuir relatóriu ne’e, klasifikasaun dadus importasaun ekonómiku ba kategoria hanesan konsumu finál formasaun kapitál fixu brutu, konsumu intermédiu, no seluk tan hamutuk $90.982.617,53 ho volume kilógrama millaun 109.502.
Relasiona ho esportasaun kafé nafatin sai hanesan produtu prinsipál nasaun nian ho folin millaun $1,7-resin ho volume kilógrama rihun 712-resin, inklui kafé kulit-mean, matak no uut.
Xina sai hanesan destinu prinsipál ba esportasaun kafé ho valór millaun $1,3, Estadu Unidu Amérika rihun $771-resin, Indonézia $772.607, Austrália $387.125, Taiwan $141.585, Singapura $3.355, Malázia $3.164, Kamboja $1.474, no seluk tan.
Dadus ne’e hatudu katak Indonézia sai nu’udar prinsipál país ne’ebé importa produtu ho millaun $32, Xina millaun $17, Índia millaun $7,2 Singapura millaun $6,8, Malázia millaun $2,9, Austrália millaun $2,4. Timor-Leste mós importa produtu husi nasaun sira iha Ázia, Europa, Amérika no Oseánia.
Notísia relevante: Importasaun sa’e, défisit komersiál Timor-Leste aumenta iha Dezembru 2025
Jornalista: Arminda Fonseca
Editora: Maria Auxiliadora
