CAC rejista keixa korrupsaun 30-resin
DILI, 25 Agostu 2026 (TATOLI)–Komisáriu Adjuntu Investigasaun Komisaun Antí-Korrupsaun (CAC, sigla portugés), Alvaro Maria Fátima, hateten, CAC rejista keixa korrupsaun hamutuk 30-resin to’o Agostu ne’e.
“Husi Janeiru to’o mai agora ha’u bele dehan katak iha 30. Prosesu ne’e ita konta hamutuk ho prosesu sira ne’ebé ita halo averiguasaun,” Alvaro Maria hateten ba jornalista sira liuhusi konferénsia impresa ne’ebé halo iha edifísiu CAC, Farol, Tersa ne’e.
Nia dehan, bainhira keixa sira ne’e tama iha CAC ne’e hahú ho averiguasaun.
“Ita bainhira hetan koñesimentu liuhusi mídia pur ezemplu Parlamentu Nasionál, ita-nia maluk Deputadu sira envoka buat ne’e iha plenária sira ko’alia buat ne’e, entaun ita rona depois balun iha mídia pur ezemplu ita-nia komunidade balun sita buat balun iha ne’ebá ne’e mak iha relasaun ho krime korrupsaun, entaun ita-nia serbisu ida iha ne’e bolu dehan serbisu informasaun seguransa serbisu ida-ne’e maka mak rekolla dadus sira ne’e hotu para depois ita tama iha averiguasaun,” nia akresenta.
Notísia relevante : MP kontinua avoka prosesu kazu korrupsaun ba CAC
Nia esplika, iha prosesu averiguasaun mak konfirma katak sasán ne’ebé mak públika alega iha rede sosiál ne’e ka buat ne’ebé mak Deputadu balun ko’alia iha rede sosiál ne’e ka levanta iha plenária iha fundamentasaun no provas inisiál hodi tama ba inkéritu.
“Prosesu sira ne’e hotu ita rekolla tuir padraun husi ida-ne’e mak ita rekomenda, katak ida-ne’e tenke tama faze kontinuasaun ba investigasaun ou haruka ba Ministériu Públiku. Buat sira etapa pur etapa la’ós kada informasaun ne’ebé ita rekolla ne’e ka ita rona iha mídia ita halo averiguasaun lae, maibé ita iha padraun ida rasik,” Komisáriu Adjuntu katak.
Jornalista : Natalino Costa
Editora : Julia Chatarina
