Sosializasaun ramata, AMB sei kontrola animál husik livre

BOBONARU, 28 Agostu 2026 (TATOLI) – Autoridade Munisípiu Bobonaru (AMB) halo ona sosializasaun kona-ba sirkulár Ijiene no Orden Públika, iha postu administrativu Atabae, Balibó no Maliana, no sei kontinua bá iha postu seluk hafoin hahú operasaun hasoru animál ne’ebé husik livre iha estrada públika no sidade laran.

Sekretáriu Autoridade Munisípiu Bobonaru ba Asuntu Planeamentu no Dezenvolvimentu Integradu, Semedo Laco Costa, hatete liuhusi sosializasaun ne’e pesoál sira kontinua hato’o informasaun ba komunidade, liuliu iha loron merkadu nian ne’ebé ema barak halo atividade.

“Sosializasaun ne’e ita halo ona ba postu tolu, Atabae, Balibó no Maliana. Agora, iha loron konsentrasaun ema barak, liuliu loron basar, ita-nia pesoál kontinua divulga informasaun ba komunidade, atu hotu-hotu iha koñesimentu antes ita hahú operasaun”, Semedo Laco dehan ba jornalista sira.

Nia esplika katak medida ne’e, liuliu atu organiza animál hanesan karau, bibi no fahi ne’ebé na’in husik livre, halai no la’o iha estrada públika ka sidade laran.

Sirkulár ne’e, Semedo komfirma katak bandu ba haki’ak-na’in animál sira atu muda fatin haki’ak, kesi no kontrola sira-nia animál, tanba animál ne’ebé halai livre bele estraga ambiente sidade no mosu risku ba ema ne’ebé uza estrada.

“Animál sira labele husik livre. Karau, bibi ka fahi ne’ebé halai no la’o iha estrada boot no sidade laran bele estraga no fo problema ba ema seluk. Tanba ne’e, ita komesa ona sosializasaun atu ema hotu bele hatene”, nia hatete.

Semedo realsa katak AMB planeia atu hahú operasaun iha fulan-Jullu, maibé autoridade deside dada tempu tanba sei kontinua fó oportunidade ba komunidade atu hetan informasaun no komprende regulamentu ne’ebé autoridade fó sai.

Nia dehan, se sosializasaun termina ona no na’in ba animál la konsidera regra sira, AMB sei hahú operasaun iha Setembru ka Outubru atu kontrola animál ne’ebé sei husik livre iha fatin públiku.

“Tempu besik ona atu ita halo operasaun. Animál ne’ebé ita hetan sei halai ka la’o livre iha estrada no sidade laran, ami sei halo tuir medida ne’ebé autoridade determina ona. Ita sei oho hotu, tanba informasaun no sosializasaun ami fó beibeik ona”, nia hato’o.

Aleinde kontrola animál livre, AMB mós organiza lixu no utilizasaun estrada urbana Maliana, liuliu bandu ema fase karreta iha dalan-ninin, tanba aktu ne’e bele estraga estrada foun ne’ebé di’ak.

“Ita hakarak organiza sidade atu furak no ordenadu, labele husik animál livre domina fali sidade”, nia dehan.

Iha parte seluk, Semedo informa katak autoridade munisípiu Bobonaru mós sei organiza no rgula estasionamentu motorizada no karreta iha sidade laran.

“Estasionamentu ne’e empreza komesa monta sinál, tau ona markasaun iha estrada sira para aban-bainrua kuandu karreta ho motor tama iha sidade laran, sira atu para karik tuir saida mak marka ona. Tinan oin ita komesa implementa para bele rekolla taxa ruma husi estasionamentu”, nia adianta.

AMB espera medida sira ne’e bele aumenta konxiénsia komunidade nian, hadi’a limpeza no orden públika, no garante sidade Maliana sai fatin ne’ebé moos, furak no seguru ba komunidade no ema hotu ne’ebé mai halo atividade.

Notísia relevante: Agostu, SEATOU halo operasaun ba animál husik livre no konstrusaun ilegál iha Balibó-Atabae

Komunidade Odete Barros husu autoridade munisípiu atu aselera implementasaun sirkulár ne’e hodi regula no organiza sidade sai moos no seguru, tanba movimentasaun animál iha via públika halo ema sai ona vitíma.

“Liuliu animál sira husik livre ne’e, iha Soso tun bá ne’e barak loos. Ita ho motór, karreta liu, ita mak para fali, la’e bele xoke. Foin horikalan alin mane na’in-rua xoke karau ida, karau ne’e mate fatin, sira-na’in rua lori bá ospitál más kondisaun mak ha’u ladún hatene. Ida-ne’e perigu tebes ba ema nia vida”, nia afirma.

Tuir observasaun Tatoli iha terrenu, animál liuliu karau kontinua movimenta livre iha área Soso to’o Nunura, inklui área kosteira sira hanesan Palaka, Atabae bá to’o Loes.

Notísia relevante: Komunidade solisita Autoridade Bobonaru halo operasaun ba asu husik livre

Jornalista: Sergio da Cruz

Editora: Maria Auxiliadora