Reuniaun OMS-SEARO ba da-79 sei realiza iha 07-10 Setembru 2026
DILI, 31 Agostu 2026 (TATOLI)—Reprezentante OMS iha Timor-Leste, Arvind Mathur, informa Reuniaun Komité Rejionál Organizasaun Mundiál Saúde ba Rejiaun Sudeste Aziátiku (OMS-SEARO) ba da-79 ba tinan 2026 ne’e sei realiza iha Dili, iha 07 to’o 10 Setembru 2026 iha Dili
Notísia Relevante: TL sei sai uma-na’in ba reuniaun Komité Rejionál OMS iha rejiaun Sudeste Aziatiku
“Ohin, ha’u iha ksolok no onra atu hasoru Prezidente Repúblika hodi fó informasaun badak kona-ba reuniaun ne’e. Reuniaun komisaun rejionál ne’e nu’udar órgaun foti desizaun másimu ba rejiaun Sudeste Aziátiku OMS nian,” Reprezentante OMS iha Timor-Leste ne’e hateten ba jornalista sira hafoin enkontru ho Prezidente Repúblika, José Ramos-Horta, iha Palásiu Prezidensiál Nicolau Lobato, ohin.
Enkontru ne’e sei partisipa husi Ministru Saúde sira ka sira-nia reprezentante seniór no delegasaun husi Estadu membru 10 husi rejiaun Sudeste Aziátiku.
Nasaun sira ne’e mak Bangladexe, Butaun, DPR Korea, Índia, Maldivas, Myanmar, Nepal, Sri Lanka, Tailándia no Timor-Leste. To’o agora iha ona konfirmasaun partisipasaun husi estadu membru sia (9).
Alende ne’e, reuniaun ne’e sei partisipa mós husi Diretór Jerál OMS, Tedros, no Ofisiál-Enkarregadu Eskritóriu Rejionál OMS Sudeste Aziátiku, Nilesh, hamutuk ho kolega sira husi Diretór, Xefe Gabinete, Diretór Administrasaun no Finansas, no funsionáriu tékniku sira husi Eskritóriu Rejionál OMS Sudeste Aziátiku.
Ajenda Foku ba Rekursu Umanu no Saúde
Serimónia abertura sei hala’o iha loron o7 Setembru iha Sentru Konvensaun Dili (CCD). Hafoin ne’e, sesaun plenária ho odamatan taka husi komisaun rejionál sei akontese iha Palm Springs.
Reuniaun komisaun rejionál ne’e sei foku ba ajenda téknika. Sei iha mós meza redonda ministeriál ne’ebé Timor-Leste mak propoin ho tópiku “Rekursu Umanu ba Saúde: Ekuidade iha Kuidadu Espesializadu”.
Arvind esplika katak iha loron 26 Agostu, semana kotuk, Ministériu Saúde hamutuk ho Eskritóriu Rejionál no Eskritóriu Nasionál OMS hala’o ona workshop sensibilizasaun ba mídia kona-ba enkontru komisaun rejionál ne’e.
Notísia Relevante: 2026: Timor-Leste sai uma-na’in ba reuniaun OMS-SEARO ba da-79
Jornalista : Hortêncio Sanchez
Editór : Cancio Ximenes
