Messi retira husi selesaun nasionál Arjentina
DILI, 01 Setembru 2026 (TATOLI) – Futebolista arjentinu Lionel Messi, ho tinan 39, retira hosi selesaun La Albiceleste iha loron-segunda (31/8), hodi esplika: “Ha’u fó ona ha’u-nia buat hotu – ha’u laiha tán buat ida atu fó – no iha jogadór joven di’ak sira ne’ebé sei mai merese atu iha-ne’ebá.”
“Ha’u hakerek liafuan sira-ne’e iha loron 21 fulan-Jullu, loron rua hafoin finál, ha’u konvensidu liután. duké nunka,” tenik Messi hodi esplika karta despedida ne’ebé nia hakerek ba selesaun arjentina liuhusi ninia postajen iha Instagram.
Lionel Messi foin lalais ne’e hetan tristeza hafoin nia aman nia mate, Jorge Messi, iha loron 8 fulan-agostu tinan 2026, ho tinan 68.
“Hafoin tempu balun liu tiha ona dezde finál no hafoin hanoin didi’ak, ha’u hakarak fó hatene ba ema hotu katak ha’u sei retira hosi selesaun arjentina.”
“Ida-ne’e desizaun ida ne’ebé mak todan, no iha laran ida-ne’e todan nafatin, maibé ha’u komprende katak tempu to’o ona. Ha’u jura ba ita-boot katak ha’u sempre fó ha’u-nia buat hotu – la’ós de’it iha tinan balun ikus ne’e bainhira ami manán buat hotu.”
“Maibé antes ida-ne’e, ha’u sempre luta no fó ha’u-nia kbiit tomak iha kampu ba kamizola ida-ne’e – atu lori ksolok ba imi no halo imi orgullu tanba sai arjentinu liuhosi futeból,” hatete hosi Messi.
Messi sai hosi selesaun Arjentina nian ho rekorde sira ne’ebé notável; nia maka markadór golu di’ak liu iha tempu tomak no jogadór ho apresiaisaun barak liu ba La Albiceleste.
La Pulga marka ona golu 125 iha jogu 207 ho asisténsia 68 ba Arjentina, fó-sai katak, tempu to’o ona, kapítulu moris nian besik atu remata, no ida-ne’e mak kapítulu ida ne’ebé maka todan tebes ba nia.
“Ha’u hadomi no sei hadomi nafatin atu halo parte iha selesaun nasionál. Ha’u fó ona buat hotu ne’ebé ha’u iha, ha’u laiha tán buat ida atu fó, no aleinde ne’e, iha jogadór joven di’ak sira ne’ebé mosu ne’ebé merese atu iha-ne’e.”
“Obrigadu ba domin tomak iha tinan 20 liubá. Ha’u sei saudades tebes atu rona ita-boot nia lian sira hosi kampu. Agora ha’u sei sai ida husi imi, oferese apoiu no anima husi liña laran (liuhosi tempu di’ak no aat sira—liuliu tempu aat sira).”
“Obrigadu ba ha’u-nia família tanba sempre iha ha’u-nia sorin, no tanba akompaña ha’u iha viajen ida-ne’e – ida ne’ebé furak tebes, maibé mós susar tebes. Obrigadu ba treinadór, kolega ekipa, no ofisiál hotu-hotu ne’ebé fahe ona viajen ida-ne’e ho ha’u. Ha’u lori ho ha’u-nia memória no momentu sira ne’ebé labele haluha.”
“Ha’u sai ho hakmatek no orgullu, tanba fó ona ba imi – hamutuk ho ha’u-nia kolega sira – momentu sira ne’ebé uluk ami mehi de’it. Ida-ne’e sai hanesan esperiénsia estraordináriu ida hodi fahe buat sira-ne’e hotu ho imi. Ha’u hadomi imi hotu!”
“Obrigadu, Maromak, tanba halo ha’u sai Arjentinu. Vamos, Arjentina!” Messi hakerek iha Instagram.
Troféu ne’ebé Messi oferese ba Arjentina
- Kampeaun Mundiál 2022
- Kampeaun Kopa Amérika 2021 no 2025
- Kampeaun Finalísima 2022
- Medalla Osan-Mean Olímpiku 2008
- Kampeaun Kopa Mundiál U-20 2005
- Bola Osan Mean Kopa Mundiál 2010 no 2022
Maske retira husi selesaun nasionál Argentina, maibé Messi sei joga nafatin iha Liga MLS Estadus Unidus Amérika, Inter Miami.
Notisia relevante: España sai kampiaun iha Kopa Mundiál 2026 hafoin halakon Arjentina 1-0
Fonte: Ajénsia EFE/Fabrizio Romano
