Karketu FC aranka ba Brunei atu kompete iha AFC Challenge League
DILI, 04 Setembru 2026 (TATOLI)–Klube Karketu Dili FC sei reprezenta Timor-Leste aranka ba Brunei Darrusalam atu partisipa iha kompetisaun Qualification AFC Challenge League 2026/2027 ne’ebé sei hala’o iha nasaun refere.
Notísia Relevante: Karketu FC reprezenta TL kompete iha “Asian Champions League Two”
Antes ba partisipa, Karketu Dili FC hala’o ona serimónia despedida hamutuk ho Federasaun Futeból Timor-Leste (FFTL) iha salaun Xanana Sports Centre, kinta lorokraik.
Tuir ajenda ne’ebé iha, ekipa Karketu Dili FC sei aranka ba Brunei Darussalam iha loron 04 Setembru no sei jogu dahuluk iha loron 08 Setembru 2026.
Iha faze prelimináriu, Karketu Dili FC sei hasoru Klubu Kasuka FC husi keipa futeból uma na’in Brunei Darussalam.
Bainhira hetan vitória, Karketu sei tama iha Grupu E hamutuk ho Manila Digger FC husi Filipina, Shan United FC husi Myanmar, no New Taipei City Hang Yuan FC husi Taiwan.
Karketu Dili FC hetan konvite direta husi Konfederasaun Futebol Ázia (AFC) hafoin sai nu’udar kampeaun ba Liga Timorense 2025.
FFTL liuhusi Diresaun Kompetisaun mós fasilita ona prosesu rejistrasaun ba kompetisaun ne’e.
Iha serimónia despedida ne’e, Sekretáriu Jerál FFTL, José Adilson Ribeiro, fó parabéns ba Karketu Dili FC no husu atu tau atensaun ba komunikasaun, esforsu no dixiplina.
“Husu atu aproveita didi’ak oportunidade ne’e atu kontinua aumenta esperiénsia iha mundu futeból,” José Adilson hateten.
Nia mós subliña katak, FFTL prontu fasilita nafatin klubu sira bainhira hetan konvite husi AFC atu partisipa iha kompetisaun internasionál.
Kompetisaun ne’e importante ba Karketu Dili FC no ba Timor-Leste tomak atu foti nasaun nia naran iha mundu futebol nian.
Jornalista : Hortêncio Sanchez
Editór : Cancio Ximenes
