MDRHK lansa Programa Revitalizasaun Komunitária iha Ritabou
BOBONARU, 04 Setembru 2026 (TATOLI) – Ministériu Dezenvolvimentu Rurál no Abitasaun Komunitária (MDRHC, sigla portugés) lansa Programa Revitalizasaun Komunitária iha aldeia alvu Samelau, suku Ritabou, postu administrativu Maliana, munisípiu Bobonaru.
Grupu Haburas Samelaun no Haforsa Samelaun, hanesan grupu benefisiáriu, daudaun ne’e haki’ak manu broiler 1.000 no fahi 10, ho apoia orsamentu besik rihun $14 husi MDRHC.
Diretór-Jerál MDRHC, Filipe de Carvalho, hatete programa ne’e nia objetivu mak atu haburas ekonomia lokál no hadi’a moris komunidade iha área rurál, liuhusi atividade pekuária, veterinária, peska, turizmu no ortikultura.
Nia esplika katak programa ne’e atu revitaliza komunidade liuhusi atividade produtiva sira, hodi kontribui ba hasa’e rendimentu ekonomia. “Grupu ida-ne’e hakiak fahi sai hanesan prioridade, tanba imi observa presu fahi karun tebetebes, tanba merkadu no ema haki’ak fahi ne’e menun. Tanba ne’e, intervensaun grupu ida-ne’ atu halo balansu presu fahi ne’ebé fa’an iha Bobonaru. Se hotu-hotu haki’ak fahi konserteza presu fahi sei baratu, depois Bobonaru sai distribuidór fahi ba munisípiu sira seluk”, nia hatete iha lansamentu ba programa ne’e.
Diretor jerál ne’e afirma katak, liuhusi programa ne’e, munisípiu Bobonaru agora koñesidu ona hanesan sentru ba atividade haki’ak manu broiler. Dadus provizóriu hatudu katak grupu sira iha munusípiu ne’e daudaun hakiak broiler liu rihun 14.
Notísia relevante: Grupu Hul-Topol no Lalia-Girál reativa atividade haki’ak manu
“Signifika katak dadus importasaun ayam potong ne’e ita diminui tiha. Se kada fulan komunidade iha munisípiu Bobonaru konsumu liu ayam potong kilógrama 1.000, ho atividade haki’ak manu ita bele diminui [importasaun]. Ita hakarak komunidade han ayam potong ida moris, la’ós ida mate ne’e”, nia dehan.
Xefe Aldeia Samelaun, Luís Bere Mau Tavares, agradese no konsidera programa ne’e bele hasa’e kreximentu ekonomia lokál, promove joven sira envolve iha atividade produtiva no parte ida mós kria postu trabalu ba komunidade no bele mós redús problema iha sosiedade.
“Uluk liu ba suku Ritabou koñesidu ho problema, baku-malu, tuda-malu maka’as, más agora iha mudansa liu husi programa ida-ne’e, tanba ema hotu-hotu halo ona atividade, tempu soe tomak ba serbisu”, nia salieta.
Totál grupu benifisiariu Programa Revitalizasaun Komunitária iha munisípiu Bobonaru to’o ona grupu 67.
Notísia relevante: Komunidade husu auditoria ba Programa Haki’ak Manu Mareko ne’ebé paradu iha Tunubibi
Jornalista: Sergio da Cruz
Editora: Maria Auxiliadora
