Waskita Karya kontinua nahe asfaltu ba estrada Noefefan-Oénunu, Progresu 14,70%
OEKUSI, 07 Agostu 2026 (TATOLI) – Empreza Estatál Indonézia, PT. Waskita Karya, kontinua nahe asfaltu ba projetu estrada husi Ponte Noefefan suku Lifau sub-rejiaun Pante Makasar ba Oénunu suku Suni-Ufe sub-rejiaun Nítibe Rejiaun Administrativa Espesiál Oekusi Ambeno (RAEOA) ho progresu fíziku atuál atinje ona 14,70%.
Notísia relevante:PA RAEOA selebra kontratu ho Waskita Karya kontinua estrada Noefefan ba Oenunu
Diretór Servisu Rejionál Obra Públika Oekusi, Remígio Nuno Sila, progresu ne’e, atuál bazeia ba kontratu foun, ne’ebé selebra iha fulan-Dezembru 2025 nian.
“Iha inísiu fulan-Agostu PT. Waskita Karya kontinua nahe asfáltiku hahú husi start-point Ponte Noefefan kuaze metru 650, iha Setembru semana kotuk kontinua nahe tan ho distánsia metru 117. Ne’ebé, agora kompañia nahe ona kilometru 1 metru 700, ho progresu fíziku atuál tuir kontratu foun, atinje ona 14,70%, tanba iha fulan kotuk 10,20%,” nia hateten ba Ajénsia TATOLI,I.P iha Oekusi, ohin.
Kompromisu ba kualidade no padraun tékniku
Tékniku Empreza Estatál Indonézia, TP. Waskita Karya, Gilang Kumoro, kompromete katak, sei kumpre padraun tékniku Bill of Quantities (BoQ), ne’ebé Governu propoin ona, nune’e bele garante kualidade projetu.
“Ita sempre prontu atu kolabora tuir orientasaun Governu Timor-Leste nian, katak kada projetu tenke iha nia kualidade, entaun saida mak ami tenke halo, tenke kumpre padraun tuir dezeñu BoQ. Ida-ne’e mak ami promete,” nia hateten.
Notísia relevante:Waskita Karya hahú hikas projetu estrada Noefefan ho kustu millaun $9 ba kilometru 14,5
Entretantu, iha loron 19 Agostu 2022 Autoridade RAEOA hahú halo lansamentu ho distánsia kilómetru 11, hanesan pakote I, hahú hosi ponte Noefefan suku Lifau, inklui suku Taiboko sub-rejiaun Pante Makasar to’o Oénunu suku Suni-Ufe sub-rejiaun Nítibe.
Projetu realibitasaun estrada nasionál ne’e, responsabiliza hosi empreza estatál Indonézia PT. Waskita Karya, ho valór kontratu millaun $23, neʼebé Autoridade RAEOA prevee hosi Orsamentu Jerál Estadu (OJE) 2022 ho durasaun serbisu fulan-18.
Maibé iha kontratu foun iha fulan Dezembru 2025, Empreza estatál PT, Waskita Karya, hahú hikas projetu referidu kustu millaun $9 hodi ezekuta ba distánsia kilometru 11 inklui projetu adisionál kilometru 3,5 atu kompleta asfáltika iha área urbana sub-rejiaun Pante Makasar vila.
Jornalista: Abílio Elo Nini
Editór: Rafael Ximenes de A. Belo
