OEKUSI, 19 Dezembru 2025 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, sesta ne’e, selebra akordu kontratu ho empreza PT. Waskita Karya atu kontinua hikas projetu estrada husi ponte Noefefan suku Lifau sub-rejiaun Pante Makasar ba Oénunu suku Suni-Ufe sub-rejiaun Nítibe.
“Asina kontratu ida-ne’e, Primeiru-Ministru konkorda ho desizaun autoridade ne’e, bainhira tama ona fulan-Setembru, prioridade importante atu bele halo lais fila-fali mak kontinua estrada Noefefan to’o Oénunu tanba paradu tinan ida-resin no kontinua edifísiu administrasaun RAEOA ne’ebé paradu tinan ualu ona,” Régio da Cruz Salu informa, iha salaun alfándega Oekusi, ohin.
Notísia relevante:Utilizasaun materiál ba konstrusaun estrada Noefefan-Oénunu la tuir BoQ
Autoridade RAEOA ne’e, subliña orientasaun Primeiru-Ministru ba Autoridade RAEOA, tenke rezolve projetu pendente sira tanba povu presiza estrada atu asesu ho dignu, nune’e bele fasilita povu no setór privadu sira-nia investimentu la’o.
“Nu’udar Prezidente Autoridade, ha’u nunka rekomenda ba asuntu tékniku, maibé tuir de’it avaliasaun ADN, obra públika rejionál MPIE nia desizaun hanesan téknika, ha’u tuir de’it desizaun sira-ne’e no fiar de’it ba Governu,” nia afirma.
Notísia relevante:ADN sobu ona projetu estrada husi ponte Noefefan-Oenunu
Diretór Diresaun Rejionál Infraestrutura, Remigío Nuno Sila, agradese tanba empreza kumpre rekomendasaun sira-ne’ebé autoridade propoin, tanba iha 2024 liuhusi avaliasaun ADN, deskobre iha materiál balun liu-liu base course la tuir padraun Bill of Quantity.
“Tanba ne’e komesa tinan kotuk iha hapara, hodi hein kompaña atu kumpre hodi halo revizaun ba BoQ, tanba haree kustu orsamentu bo’ot, entaun hamosu konkordánsia atu kontinua adisionál ba item serbisu, ne’ebé ohin komesa selebra ona akordu, ba oin empreza bele hahú fali konstrusaun,” nia dehan.
Jestór PT. Waskita Karya, Myunus A, kompromete katak sei garante kualidade konstrusaun bazeia rekomenadasaun sira, importante iha kooperasaun no serbisu hamutuk, nune’e bele ultrapasa obstkalu sira to’o faze finalizasaun.
“Hanesan kontratór, ami agradese tebes ba oportunidade hodi partisipa iha dezenvolvimentu rejiaun Oekusi nian. Hanesan ita-boot sira hatene, dezde inísiu, ami kompromete ona atu entrega projetu ne’e ho kualidade ne’ebé aas liu no iha prazu ne’ebé determina ona. Aleinde ne’e, ami mós hein kooperasaun di’ak entre ami-nia parseiru sira, tantu husi parte kontratór no husi parte fornesimentu traballu nian ka DRI, Ita hein katak ami hotu bele ultrapasa obstákulu ne’ebé hasoru durante projetu ne’e liuhusi kooperasaun ne’ebé di’ak,” nia orgullu.
“Kona-ba kontinuasaun serbisu ne’e, ami nafatin komprometidu atu hadi’a konetividade entre distritu no área rurál sira. Ami hein atu kompleta projetu ne’e iha tinan ne’e atu nune’e konetividade entre rejiaun Oekusi kontinua buras. Ami mós hein katak ami bele kontinua kolabora ho di’ak iha futuru, tanba buat hotu hahú hosi rekursu umanu, ekipamentu, no materiál sira,” nia promete.
Notísia relevante:Autoridade RAEOA planu loke konkursu foun ba projetu estrada husi Noefefan bá Oénunu
Molok ne’e, iha fulan-Jullu 2024, Governu liuhusi Ministériu Planeamentu no Investimentu Estratéjiku (MPIE) akompaña husi Ajénsia Dezenvolvimentu Nasionál (ADN) hamutuk ho Autoridade RAEOA, orienta kompañia Estatál PT.Waskita Karya sobu fali projetu estrada kilomentru neen (6) inklui alkatraun kilometru tolu (3) husi ponte Noefefan liga bá Oénunu tanba ho razaun la kumpre padraun Bill of Quantity (BoQ).
Rekorda fali katak estrada pakote A husi Ponte Noefefan bá Oénunu, sub-rejiaun Nítibe, Autoridade RAEOA hatu’ur fatuk dahuluk iha loron 19 Agostu 2022 no kompañia Waskita Karya ezekuta ho distánsia kilómetru 11 ho valór kontratu millaun $23.
Jornalista: Abílio Elo Nini
Editór: Rafael Ximenes de A. Belo
