Waskita Karya hahú hikas projetu estrada Noefefan ho kustu millaun $9 ba kilometru 14,5
OEKUSI, 05 Agostu 2026 (TATOLI) – Empreza estatál Indonézia, PT Waskita Karya, hahú hikas ona projetu estrada husi ponte Noefefan ba Oénunu ho kustu millaun $9 hodi ezekuta ba distánsia kilometru 11, inklui projetu adisionál kilometru 3,5 atu kompleta asfáltika iha área urbana sub-rejiaun Pante Makasar vila.
Diretór Serbisu Rejionál Obra Públika Oekusi, Remígio Nuno Sila, informa katak verba ne’e diferénsia ho kontratu anteriór ho valór millaun $23-resin hodi ezekuta ba kilometru 11, hahú husi ponte Noefefan (suku Lifau, sub-rejiaun Pante Makasar) to’o Oénunu (suku Suni-Ufe, sub-rejiaun Nítibe).
Notísia relevante:PA RAEOA selebra kontratu ho Waskita Karya kontinua estrada Noefefan ba Oenunu
Maibé, hafoin suspende iha tinan-2024 tanba deteta irregularidade iha materiál base-course liuhusi teste laboratóriu, iha Dezembru 2025, Autoridade RAEOA ho empreza estatál Waskita Karya selebra akordu ofisiál ida hodi kontinua projetu ne’e ho verba millaun $9 de’it ba kilometru 11 inklui adisionál kilometru 3,5.
“Iha 2024 ita halo karta reparasaun hapara kontratu, maibé to’o Autoridade atuál iha obrigatóriu tenke hatutan, tanba antes ne’e iha irregularidade ba materiál base-course la pasa iha teste laboratóriu no labele tama iha kategória estandarte, nune’e maka husi parte RAEOA hamutuk ho ADN, I.P. ita hapara kontratu, maibé iha Dezembru 2025 ita hamosu kontratu foun, PT.Waskita Karya bele kontinua hikas obra ne’e, no valór tuun no aumenta serbisu,” Remígio Sila ba Ajénsia TATOLI, I.P. iha Oekusi.
Notísia relevante:ADN sobu ona projetu estrada husi ponte Noefefan-Oenunu
Dirijente setór infraestrutura Oekusi ne’e esplika, progresu fíziku atuál atinje ona 6%, tanba kontratu foun nia ezekusaun serbisu mós tenke hahú husi inísiu. Kompara ho kontratu tuan nia verba millaun $29-resin ho nia progresu fíziku maka 65%.
“Maibé, agora kontratu fali ho millaun $9, nia progresaun progresu fiziku mak 6% ona. Ne’ebé 6% ne’e, nia item serbisu n maka ateru rai, kontinua asfaltu husi Noefefan ba Aos-Ero, no parte Maquelba nian,” nia esplika.
Aumenta projetu adisionál
Diretór Rejionál Obra Públika ne’e esklarese katak, kontratu foun ne’ebé parte rua –autoridade RAEOA no empreza PT Waskita Karya –konkorda hodi selebra ba kilometru 11 ho nia verba millaun $9 no aumenta adisionál kilometru 3,5.
“Tanba haree ba orsamentu nia volume boot entaun komunikasaun liuhusi interpretasaun tékniku, haree katak presiza iha adisionál tanba kustu ne’e presiza rekupera nune’e maka hamosu kilometru 3,5 ba iha asfaltu urbana, liliu estrada sira-ne’ebé seidauk hanesan Palaban ba Masin, rotunda Numbei no fatin seluktan,” nia hateten.
Notísia relevante:Xefe Governu orienta ADN no DRI monitoriza projetu estrada Noefefan ba Oénunu
Rekorda fali katak Autoridade RAEOA iha loron 19 Agostu 2022 halo lansamentu projetu estrada ho distánsia kilómetru 11 hanesan Pakote I, hahú hosi ponte Noefefan (suku Lifau), inklui suku Taiboko sub-rejiaun Pante Makasar to’o Oénunu (suku Suni-Ufe, sub-rejiaun Nítibe).
Projetu reabilitasaun estrada nasionál ne’e responsabiliza hosi empreza estatál Indonézia PT Waskita Karya, ho valór kontratu millaun $23, neʼebé Autoridade RAEOA prevee husi Orsamentu Jerál Estadu (OJE) 2022 ho durasaun serbisu fulan-18.
Jornalista: Abílio Elo Nini
Editór: Rafael Ximenes de A. Belo
