OEKUSI, 21 Janeiru 2026 (TATOLI) – Primeiru-Ministru (PM), Kay Rala Xanana Gusmão, kuarta ne’e, observa direta progresu fíziku projetu reabilitasaun estrada husi Ponte Noefefan suku Lifau sub-rejiaun Pante Makasar ba Oénunu suku Suni-Ufe sub-rejiaun Nítibe.
Iha vizita ofisiál ne’e, Xefe Governu akompaña husi Ministru Planeiamentu Investimentu no Estratéjiku hamutuk ho Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, no tékniku sira husi Diresaun Rejionál Infraestrutura (DRI), Ajénsia Nasionál Dezenvolvimentu (ADN).
Atividade observasaun direita iha terrenu remata, Jestór Empreza Waskita Karya, aprezenta progresu serbisu ba Xefe Governu ho ekipa, kona-ba kontratu renovasaun, verba kontratu inklui aprezenta mós forsa traballu no ekipamentu sira.
Hafoin aprezentasaun, Primeiru-Ministru orienta kedas tékniku sira husi DRI no ADN, atu kontinua monitoriza no halo fiskalizasaun semanál, nune’e bele fó hanoin beibeik bá empreza atu garantia kualidade.
Notísia relevante:ADN sobu ona projetu estrada husi ponte Noefefan-Oenunu
“Ha’u sei la mai beibeik iha ne’e, projetu ne’e mós antes ne’e suspende tanba la kumpre nia padraun, dezeñu BoQ no buat seluktan, maibé sira infraestrutura Oekusi no ADN sei mai nafatin kada semana dala ida, sei sira la mai, ha’u mak ami, atu haree imi, importante serbisu di’ak, kualidade mak ami presiza,” Primeiru-Ministru dehan, iha sesaun aprezensaun hala’o iha eskritóriu Empreza Waskita iha Ponte Noefefan, kuarta lorokraik ne’e.
Notísia relevante:PA RAEOA selebra kontratu ho Waskita Karya kontinua estrada Noefefan ba Oenunu
Jestór empreza Waskita Karya, Wishna, orgullu ho konfiansa ne’ebé Governu Timor-Leste fiar, tanba ne’e sira promete sei kumpre rekomendasaun sira-ne’ebé propoin husi Primeiru-Ministru no parte tékniku sira.
“Agradese ba fiar ne’ebé Governu fó mai ami Waskita, foin daudaun ami iha konkordánsia ho Autoridade RAEOA, atu kontinua fali projetu ne’e, ne’ebé ami iha konkordánsia, katak sei kontinua asfaltiku sira balun iha estrada vila laran hanesan adisionál, ne’ebé progresu serbisu oras ne’e daudaun ami atinje ona 50%. Bainhira ami finaliza mak sei kontinua fali ba projetu adisionál sira,” nia hateten.
Notísia relevante:Xanana observa projetu estrada Tono – Oésilo no rekomenda pontu rua ba Waskita
Antes ne’e, iha fulan-Jullu 2024, Governu liuhusi MPIE akompaña husi ADN no DRI hamutuk ho Autoridade RAEOA, orienta empreza Waskita Karya sobu fali projetu estrada kilometru neen (6) inklui asfaltika kilometru tolu (3) husi ponte Noefefan to’o Maquelab suku Taibobo ho razaun tanba la kumpre padraun Bill of Quantity (BoQ).
Rekorda fali katak, projetu estrada ne’e hanesan pakote A hahú husi ponte Noefefan suku Lifau sub-rejiaun Pante Makasar ba Oénunu suku Suni-Ufe sub-rejiaun Nítibe ho distánsia kilometru 11-resin ho valór kontratu millaun $23.
Jornalista: Abílio Elo Nini
Editór: Rafael Ximenes de A. Belo
