OEKUSI, 27 Novembru 2025 (TATOLI) – Primeiru-Ministru, Kay Rala Xanana Gusmão, kinta ohin, observa direta projetu estrada husi eis-merkadu Tono suku Cunha sub-rejiaun Pante liga suku Bobometo sub-rejiaun Oésilo, no rekomenda pontu rua ba empreza konstrutora PT. Waskita Karya atu kumpre hodi define estatutu kualidade rai ba estrada no aumenta morru protesaun (penahan).
“Projetu bo’ot sira hanesan ne’e, no mós ita-nia rai ne’e fraku tebes, ne’ebé mai observa hodi rekomenda buat ruma ba tékniku sira, atu haree tok oinsá bele hadi’a, tanba projetu boot no naruk sei kle’ur. Se ita la haree ba ida-ne’e, nia la’o, la’o to’o fin laiha kualidade” Primeiru-Ministru informa ba jornalista sira iha Oésilo, ohin.
Notísia relevante:Rogério Lobato preokupa projetu estrada Tono ba Oésilo gasta millaun 33-resin
Xefe Governu fó ezemplu, hanesan estrada sira iha kapitál Dili, husi Komoro ba Aileu, ema barak observa no haree, maibé iha Oekusi diferente uitoan, tanba nia kualidade oioin de’it, hanesan iha munisipíu Ermera bolu rai manuten dodok maibé iha Oekusi rai-henek fali.
“Tan ne’e mak ha’u mai haree, só bele mós kontribui ho hanoin balun, tanba ha’u la’ós tékniku, mas tanba haree ona projetu sira seluk ne’ebé monu beibeik, kontribui ho hanoin balun, nune’e tékniku sira bele haree no tetu didi’ak, atu ita gasta osan duni maibé gasta ba di’ak,” nia hateten.
Diretór Diresaun Rejionál Infraestrutura, Rémigiu Nuno Sila, informa katak iha obervasaun ne’e, Primeiru-Ministru rekomenda pontu rua ba tékniku sira husi obra públika Oekusi, atu kontinua fiskaliza, nune’e bele garante kualidade, tanba progresu serbisu daudaun ne’e atinje ona 49%.
“Ohin Avo Nana kestiona buat barak, primeiru kondisaun sotkrit ka rai ne’ebé aterru, kuandu ita la haree ba nia aspetu tékniku bele afeta ba errosaun. Rekomendasaun daruak ba estatutu rai, rai ne’ebé kompañia ke’e, depois soe iha rai-loron, entaun ida-ne’e impaktu boot. Ne’ebé, ohin ha’u simu rekomendasaun hamutuk ADN, Ministru Obra Públika ho Primeiru-Ministru, husu haree asuntu ne’e emerjénsia tanba serbisu fíziku to’o ona 49,84%, entaun kontinua fiskaliza, selae udan boot bele akontese errosaun no rai-halai bele taka tomak estrada, entaun Avo hakarak aumenta morru protesaun atu satan rai labele monu,” nia haktuir.
Notísia relevante:Autoridade hala’o serimónia kulturál molok ezekuta estrada nasionál Tono ba Oésilo
Iha biban ne’e, Jestór Projetu Waskita Karya, Ikhwan, promete sei kumpre rekomendasaun sira, antes to’o tau asfaltika, tanba daudaun ne’e empreza foin hahú nahe asfaltika iha suku Bobokase no suku Naimeko.
“Kami siap, untuk melengkapi rekomendasi apa saja, yang disampaikan oleh Perdana Menteri, bahwa harus lihat baik-baik kualitas tanah disini sebelum di aspalkan, karena sementara di bawah Naimeko dan Bobokase, sudah melaksanakan proses pengaspalan, jadi kami akan tetap semangat karena alat-alat kita stanby disini, (Ami prontu atu kumpre rekomendasaun saida de’it mak hato’o husi Primeiru-Ministru, katak ami tenke haree didi’ak kualidade rai iha ne’e molok halo alkatraun, tanba iha Naimeko no Bobokase nia okos, prosesu alkatrasaun ne’e hala’o tiha ona, tanba ne’e ami sei enerjetiku nafatin tanba ita-nia ekipamentu standby iha ne’e)”, nia promete.
Observasaun Jornalista Ajénsia Tatoli,I.P, durante prezensa Primeiru-Ministru iha konstrusaun projestu estrada ne’e, hetan akompañamentu husi Ministru Obra Públika, Diretór Ajénsia Dezenvolvimentu Nasionál (ADN), Diresaun Rejionál Infraestrutura (DRI), Prezidente Autoridade RAEOA no Koordenadór ZEEDOA.
Notísia relevante:Autoridade RAEOA hahú rezolve projetu pendente, extensaun, inklui estrada Tono ba Oésilo
Entretantu, empreza Internasionál PT. Waskita Karya, ezekuta projetu estrada nasionál ne’e hahú husi eis-merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru 17, ezekuta ho valór kontratu millaun $33,915,000.00, orsamentu ne’e Autoridade RAEOA prevee husi Orsamentu Jerál Estadu (OJE) 2023 nian, ho durasaun servisu durante tinan rua.
Jornalista: Abílio Elo Nini
Editór: Rafael Ximenes de A. Belo
