Manorin ETV 22 konklui ona formasaun língua portugeza nível A2 iha Oekusi

OEKUSI, 08 Agostu 2026 (TATOLI) –   Institutu Nasionál Formasaun Dosente  no Profisionál Edukasaun (INFORDEPE, Sigla Portugés), akompaña husi Diresaun Servisu Rejionál Edukasaun, segunda ne’e, atribui sertifikadu língua portugeza ho nível A2 ba manorin na’in-22 husi Ensinu Sekundáriu Tékniku Vokasionál (ETV) hafoin konklui formasaun durante oras 120 iha Rejiaun Administrativa Espesiál Oekusi Ambeno (RAEOA).

Prezidente INFORDEPE, Domingos Martins, esplika katak, formasaun língua portugeza ne’e dedika espesiál ba profesór Ensinu Sekundáriu Tékniku Vokasionál ba nível A2, ho totál formandu 25 maibé iha finalidade na’in-22 mak konsege finaliza kursu ne’e ho durasaun formasaun oras 120.

Nune’e mós, formasaun ne’e ho kontéudu kurrikulár matéria relasaun ho formasaun modulu nível A2 nian, liuhusi parseiriu ho Instituto Camões.

“Língua portugeza importante, profesór sira bele hanorin disiplina hotu ho portugés, mezmu balun ladun intende tanba língua ofisiál tetun ho portugés, maibé orientasaun katak disiplina hotu tenke ho língua portugeza, tanba ne’e maka ohin ita distribui ona sertifikadu ba benefisiáriu na’in-22,” nia hateten iha salaun sentru formasaun profesór Oekusi, ohin.

Artigu 13.º Konstituisaun Repúblika Demokrátika Timor-Leste defende katak língua ofisiál Timor-Leste nian mak Tetun no Portugés.

Prátika no komunika lorloron

Iha biban ne’e, nia enkoraja formandu sira, katak, bainhira hetan ona kapasitasaun sufisiente, presiza halo prátika iha terrenu liuhusi komunikasaun direta.

“Sei ita hakarak língua ida sai viva, tenke prátika no komunika lorloron, tantu ho alunu, komunidade no mós iha prosesu ensinu aprendizajen. Ne’ebé, hakarak língua ida viva, tenke ko’alia sai, la’ós apenas simu de’it sertifikadu maibé la ko’alia sai, ne’ebé profesór sira tenke ko’alia sai,” nia apela.

Notísia relevante:PR Horta husu dezenvolve lingua Portugeza hanesan dalen tetun

Iha fatin hanesan, Diretór Servisu Rejionál Edukasaun Oekusi, Vincêncio Cono, konsidera formasaun nesesáriu ba manorin sira, nune’e bele garante kualidade língua portugeza iha prosesu letiva lorloron nian iha instalasaun eskolar sira.

“Formasaun ohin ne’e remata ona mak ita simu sertifikadu, maibé ha’u espera profesór sira atu labele para de’it iha ne’e, maibé tenke kontinua aplika koñesimentu ne’ebé hetan ona hodi fahe ba estudante sira iha eskola ida-idak,” nia hateten.

Entretantu, manorin 22 ne’e mai husi Eskola Sekundáriu Tékniku Vokasionál (ETV) haat, maka hanesan, ETV Palaban, ETV Agríkola, ETV Pássabe no ETV Mahata.

Notísia relevante:Governu komprometidu dezenvolve língua portugeza

Jornalista: Abílio Elo Nini

Editór: Rafael Ximenes de A. Belo