PNTL Kovalima garante seguransa ba atividade Enduro ne’ebé organiza husi STRAC
KOVALIMA, 11 Setembru 2026 (TATOLI) – Komandu Polísia Nasionál Timor-Leste (PNTL) Munisípiu Kovalima garante seguransa ba atividade Enduro ne’ebé realiza husi STRAC iha Munisípiu Kovalima.
“Ha’u hala’o formatura Jerál hodi garante seguransa durante realizasaun eventu enduro iha Munisípiu Kovalima,” dehan Komandante PNTL Munisípiu Kovalima, Superintendente Xefe Polísia Paulo Carmo Ferreira, ba jornalista sira iha Camnasa.
Atu asegura seguransa durante eventu enduro, Polísia Nasionál Timor-Leste (PNTL), envolve unidade sira hanesan Unidade Patrullamentu Fronteira (UPF), Unidade Polísia Militar (UPM), Companhia de Operações Especiais (COE), Batallauj ordem Públiku (BOP) no F-FDTL.
Eventu enduro ne’e hanesan eventu nasionál ne’ebé envolve partisipante husi munisípiu hotu, inklui partisipante husi nasaun viziñu Indonézia. Eventu ne’e iha modalidade oioin, hanesan Enduro Soke Ai-Laran, Adventure Trabas no Motor Cross.
Bazeia ba rute Soke Ai Laran, atividade hahú iha Camnasa, tuir mota Karau Ulun, sai iha Ogues, kontinua ba Maligirik, depois sai iha Lokeu Foho, tun mai Merkadu no ikus fila fali ba Camnasa. Atividade Motor Cross no eventu enduro sei hala’o iha Camnasa.
Iha fatin hanesan, Prezidente Suai Trail Community (STRAC), Alarico Lay, esplika katak Suai Trail Community organiza eventu ne’e tanba hetan apoiu orsamentu husi Ministériu Juventude, Desportu, Arte no Kultura (MJDAC), hamutuk $7.000.
“STRAC organiza eventu enduro, Motor Cross no Adventure Trabas. Partisipante sira ne’ebé hetan pozisaun primeiru to’o terseiru sei simu prémio,” nia esplika.
Bazeia ba alokasaun orsamentu ba manan-na’in sira, eventu enduro iha orsamentu prémio hamutuk $1,500.
Enkuantu ba kompetisaun Motorcross, orsamentu ba prémiu manan-na’in sira hamutuk $1,650, ho kategoria CSE 250, SE 85, motorizada rakitan CC 200 no motorizada Star, ne’ebé laiha variasaun. Tuir planu, eventu ne’e sei hahú iha 12 Setembru no remata iha 13 Setembru 2026.
Jornalista: Celestina Teles
Editór: Florencio Miranda Ximenes
