AIFAESA I.P atualiza servisu iha RAEOA no disponiliza rai atu instala edifísiu
OEKUSI, 15 Setembru 2026 (TATOLI) – Autoridade Inspesaun no Fiskalizasaun Atividade Ekonómiku Sanitária no Alimentár Institutu Públiku, (AIFAESA,I.P), liderada Inspetóra Jerál AIFAESA, Odete Viegas da Silva, segunda ohin, atualiza progresu servisu ba Prezdente Autoridade iha Rejiaun Administrativa Espesiál Oekusi Ambeno (RAEOA), Régio da Cruz Salu, no disponibiliza ona rai ba futuru atu konstrui edifísiu AIFAESA nian iha Oekusi.
“Asuntu rua importante atualiza ohin iha sorumutu ne’e, kona-ba edifísiu ne’ebé Prezidente Autoridade disponibiliza ona fatin antes ne’e, maibé ho laran-luak, ohin Autoridade RAEOA hakarak oferese tan rai ba futuru instala edifísiu AIFAESA nian iha Oekusi,” Odete Viegas da Silva hateten ba jornalista sira iha Gabinete Autoridade Oekusi, ohin.
Notísia relevante:AIFAESA hametin kompromisu hodi proteje saúde públika no seguransa alimentár
Inspetora Jerál AIFAESA ne’e orgullu ba kooperasaun Autoridade RAEOA, ne’ebé durante ne’e apoia tebes servisu AIFAESA nian iha Oekusi, hafoin estabelese funsionáriu destakadu sira iha Oekusi kompleta tinan ida ona.
“Ohin, ami ko’alia ita mós kona-ba, progresu servisu AIFAESA nian, durante ne’e hala’o ona iha Oekusi, atu haree ba nia bantajén no desbantajén ne’ebé AIFAESA iha, sá progresu saida mak ita halo ona iha Oekusi, no operadór ekonómiku hira mak mellora ona sira-nia servisu, sei iha difikuldade ruma, ita sei haree kabe ba AIFAESA ou kabe ba instituisaun seluk nia responsabilidade nune’e ami bele fó hanoin hamutuk nune’e labele iha tan fallansu ruma ne’ebé prezudika operadór ekonómiku sira, ida-ne’e mak ohin ami deskuti hamutuk ho Prezidente Autoridade RAEOA,” nia afirma.
Notísia relevante:AIFAESA sei estabelese laboratóriu ai-han iha tinan ida-ne’e
Iha fatin hanesan, Prezidente Autoridade RAEOA, Régio da Cruz Salu, komprometidu katak Autoridade RAEOA atribui rai nu’udar obrigasaun morál institusionál RAEOA nian, hodi fasilita servisu administrasaun AIFAESA nian konsentradu.
“Ida-ne’e obrigasaun morál institusionál RAEOA la’ós promove maibé atu fasilita servisu besikliu inter relasionamentu no obrigasaun Estadu, entre Sentrál no RAEOA ba asuntu AIFAESA, ida ne’e importante, tan ne’e ohin sei akompaña ekipa ho Inspetora atu ba haree fatin besik aeroportu Palaban, asesu mós ba públiku atu rezerva ba futuru konstrui edifísiu administrativu AIFAESA nian iha Oekusi, nune’e servisu administrativu rejionál konsentradu,” nia hateten.
Jornalista: Abílio Elo Nini
Editór: Rafael Ximenes de A. Belo
