Jornalista internasionál 100-resin halibur iha Nanning hodi halo kobertura ba CAEXPO da-23
NANNING (XINA), 17 Setembru 2026 (TATOLI) – Reprezentante mídia 100-resin mai husi Xina no nasaun oioin halibur iha Nanning, Rejiaun Autónoma Guangxi Zhuang, Xina, hodi halo kobertura ba atividade Expo Xina-ASEAN (CAEXPO) ba da-23 no Simeira Negósiu no Investimentu Xina-ASEAN 2026 (CABIS).
Antes abertura ba eventu rua ne’e, jornalista sira tuir jantar ida ne’ebé organiza husi ekipa organizadora CAEXPO no CABIS iha Nanning iha kuarta-feira kalan.
Deputy Commander CAEXPO, CABIS ba da-23 no Diretór Departamentu Notísia no Publisidade, Li Pan, fó benvindu ba jornalista sira ne’ebé halo ona viajen husi nasaun oioin hodi halo kobertura ba eventu sira no relata progresu kooperasaun Xina-ASEAN ba públiku.
“Ita sente sai belun loloos ne’ebé besik malu, la importa distánsia sira. Ida-ne’e hanesan ksolok ida atu halibur ho belun tuan no foun sira iha Nanning, Guangxi”, Li Pan hatete iha nia diskursu.
Nia hato’o nia apresiasaun ba mídia xinés no internasionál sira ne’ebé hala’o viajen bá Guangxi hodi asiste uma-na’in ba CAEXPO no CABIS, nomós progresu kooperasaun ekonómika no komersiál Xina-ASEAN nian.
Tuir nia, prezensa husi mídia husi nasaun oioin oferese oportunidade ida hodi asiste diretamente rezultadu sira husi relasaun viziña di’ak sira no kooperasaun ekonómika no komersiál ne’ebé kle’an entre Xina no nasaun sira ASEAN nian.
Entre jornalista sira ne’ebé halo kobertura ba eventu ne’e maka Mediana, jornalista ekonomia nian iha jornál diáriu Indonézia ‘Kompas’, konsidera oportunidade atu kobre CAEXPO no CABIS 2026 pesoalmente hanesan esperiénsia espesiál ida, partikularmente tanba fórum tinan ida-ne’e nian foka ba oportunidade sira relasiona ho implementasaun Área Komérsiu Livre Xina-ASEAN (CAFTA) 3.0.
“Ida-ne’e hanesan esperiénsia ida ne’ebé espesiál tebes ba ha’u, no ha’u sente onradu bele hola parte iha okaziaun ida-ne’e”, Mediana dehan ba Tatoli, iha Nanning.
Nu’udar jornalista iha área ekonomia, Mediana iha interese atu haree besik liután diresaun kooperasaun komérsiu no investimentu entre Xina no ASEAN, partikularmente iha setór ekonomia dijitál.
Tuir nia haree, dezenvolvimentu ekonomia dijitál maka kestaun xave ida ba Indonézia, tanba nasaun ne’e ativamente buka hela transformasaun dijitál inklui dezenvolvimentu telekomunikasaun 5G, intelijénsia artifisiál (IA), no sentru dadus sira.
Nia nota katak Indonézia iha potensiál atu hala’o papél signifikativu entre nasaun sira ASEAN nian iha implementasaun China-ASEAN Free Trade Area (CAFTA) 3.0, liuliu haree ba área oioin iha ekonomia dijitál nia laran ne’ebé oferese oportunidade sira ba kooperasaun ho Xina.
“Indonézia mós iha vizaun ida ba ekonomia dijitál ne’ebé bele konsidera hanesan aliña ho Xina nia vizaun rasik”, nia hatete.
Mediana mós haree CAEXPO no CABIS hanesan oportunidade sira ba jornalista sira atu observa diretamente oinsá perspetiva sira kooperasaun ekonómika nian tradús ba relasaun negósiu no investimentu loloos.
Nia hein katak série eventu sira, partikularmente enkontru sira negósiu no investimentu nian sei fornese imajen ida ne’ebé klara liu kona-ba evolusaun husi lasu ekonómiku sira entre Indonézia no Xina, no mós Xina nia relasaun luan liu ho ASEAN.
Tinan ida-ne’e, CAEXPO no CABIS fó prioridade ba kooperasaun ekonómika no komersiál, dezenvolvimentu IA, no envolvimentu korporativu hanesan ajenda xave sira. Organizadór sira mós organiza ona maizumenus eventu sekundáriu 50 ne’ebé relasiona ho komérsiu no ekonomia durante espozisaun tomak.
Prezensa hosi jornalista sira husi nasaun oioin iha Nanning hein atu habelar divulgasaun informasaun nian kona-ba komérsiu, investimentu, inovasaun teknolójiku, no oportunidade sira kooperasaun nian ne’ebé diskute iha CAEXPO ba da-23 no CABIS.
Notísia relevante: Portu Qinzhou hametin komérsiu Xina no ASEAN
Jornalista: Arminda Fonseca
Editora: Maria Auxiliadora
