Vise-MSSI observa pasiente labarik ho má-nutrisaun iha Ospitál Referál Oekusi
OEKUSI, 16 Setembru 2026 (TATOLI) – Vise-Ministra Solidariedade Sosiál no Inkluzaun (MSSI), iha Rejiaun Administrativa Espesiál Oekusi Ambeno (RAEOA), Ceu Brites, kuarta ohin, hala’o vizita ofisiál ba pasiente labarik sira-ne’ebé sofre kazu má-nutrisaun iha Ospitál Referál Oekusi.
Governante ne’e informa katak, objetivu husi vizita ofisiál ne’e, atu observa atendimentu husi fasilidade saúde ba pasiente sira-nia kondisaun durante halo internamentu iha Ospitál Referál Oekusi.
“Ami mai hasoru labarik sira iha difikuldade saúde, entaun ami haree hamutuk ho servisu saúde, la’ós problema nutrisaun de’it maibé iha mós problema seluk, entaun horsehik ami hamutuk ho servisu saúde lori labarik ki’ikoan na’in-rua akompañia ho sira-nia inan, maibé inan mós iha komplikasaun saúde nian,” nia hateten iha vizita Ospitál Oekusi, ohin.
Ne’ebé, doutor sira liuhusi espesialista pedeatrista iha maka hala’o kedas atendimentu imediatu dezde loron tersa horsehik, no ohin ki’ikoan na’in-rua ne’e nia kondisaun saúde kompara ho antes ne’e iha diferénsia kedas.
“Ita agradese ba Ospitál Oekusi, liliu doutor sira-nia atendimentu kapaas no hatudu rezultadu ba pasiente sira-nia kondisaun saúde. Ha’u rekomenda nafatin, haree ita-nia pasiente sira ho di’ak atende ho domin, tanba sira-nia esperansa bainhira baixa iha fasilidade saúde, hakarak hetan isin di’ak, nune’e sira bele kontente hanesan ema seluk,” nia hateten.
Notísia relevante:Xefe suku ezije solusaun ba kazu má-nutrisaun no subsídiu EhD iha Oekusi
Espesialista ba má-nutrisaun iha Ospitál Referál Oekusi, Doutor Carlo Manuel Dias, esplika katak, atedimentu ba pasiente ho kazu má-nutrisaun presiza akompaña ho família nune’e bele realiza prosesu interrogatóriu ba kauza prinsipál sira.
“Komesa horsehik pasiente rua ne’e komesa baixa ho má-nutrisaun, ohin ekipa halo deskusaun kona-ba ai-moruk depois presiza segmentu, ne’ebé ha’u presiza haree no ko’alia ho família, no realiza interrogatóriu barak hodi buka kauza prinsipál, bele sofre má-nutrisaun ka la’e, depois halo exame fizíku no konsulta ho nia raan no kaben,” nia hateten.
Notísia relevante:Parseiru dezenvolvimentu asina akordu ho Governu kombate má-nutrisaun
Entretantu, bazea dadus peskiza husi Timor-Leste Food and Nutrition Survey (TLFNS) iha 2020, Timor-Leste enfrenta kazu stunting ne’e 47% no aas ona iha nível rejionál, husi númeru 47% ne’e, RAEOA okupa fatin datoluk iha Timor-Leste ho pursentu 57% depoizde Ermera % no Ainaro.
Jornalista: Abílio Elo Nini
Editór: Rafael Ximenes de A. Belo
