SMOP estabelese estasionamentu no plaka toponímia iha Maliana
BOBONARU, 17 Setembru 2026 (TATOLI)-Diresaun Servisu Munisipál Obras Públika, Autoridade Munisípiu Bobonaru hahú implementa projetu estabelesimentu estasionamentu ho totál pakote lima no instala plaka toponímia iha postu administrativu Maliana ho objetivu atu organiza sidade no transporte.
Projetu ne’e implementa husi kompaña lokál Regenciv Unipessoal Lda ho valór orsamentu $75.300 ne’ebé hahú iha loron 14 fulan-Agostu no sei finaliza iha 31 Dezembru tinan 2026.
“Kompañia komesa ona monta sinál, tau ona markasaun iha estrada sira para aban-bainrua kuandu karreta ho motór tama iha sidade laran, sira para karik tuir saida mak marka tiha ona. Labele para fali iha fatin arbiru. Tinan ne’e ita sei prepara kondisaun, tinan oin ita komesa implementa para rekolla taxa ruma husi estasionamentu”, Sekretariu Asuntu Plaenamentu Dezenvolvimentu Integradu, Semedo Laco Costa, informa.
Komunidade Pedro de Jesus dehan establesimentu estasionamentu bele organiza transporte no evita engarrafamentu.
“Agora ita-nia estrada di’ak ona, presiza tebes duni iha parkiran, nune’e karreta no motór para iha nia fatin, labele para abiru iha estrada laran, ninin, tanba uluk ne’e kuandu basar ka rame ruma para arbiru de’it depois macet”, nia dehan.
Notísia relevante: Komunidade husu regula karreta sira ne’ebé estasiona iha merkadu Maliana
Estasionamentu (fatin para karreta/motór no Plaka Toponímia ka plaka naran estrada ka fatin) iha funsaun importante tebes ba organizasaun sidade no transporte mak organiza tráfegu, katak karreta no motór labele para arbiru iha estrada ninin, nune’e la halo tráfegu saitrauma ka engarrafamentu; asegura veíkulu mak fatin estasionamentu ne’ebé di’ak fó seguransa boot liu ba veíkulu sira husi na’ok-teen ka asidente.
Aleinde ne’e, fasilita atividade ekonómika ba kliente sira atu para sira-nia veíkulu ho haksolok wainhira bá sosa sasán iha loja, supermerkadu, ka vizita fatin públiku sira; ajuda sidade atu moos, ordenadu, no kapaas tanba veíkulu sira la kahur iha fatin-fatin.
Funsaun husi Plaka Toponímia mak hanesan identifikasaun fatin, fó informasaun klara kona-ba naran estrada, bairru, suku, ka monumentu sira; fasilita orientasaun (navigasaun), ajuda komunidade, turista, no motorista sira atu hetan diresaun no fatin ne’ebé sira atu bá ho fásil; fasilita servisu emerjénsia ka juda polísia, ambulánsia, no bombeiru atu to’o lalais iha fatin akontesimentu wainhira iha emerjénsia; servisu lojístiku no korreiu ka fasilita servisu entrega sasán (entregas/courier) no karta sira atu to’o loloos iha uma-na’in nia fatin; no prezerva istória no kultura katak naran sira iha plaka laran barak liu foti husi erói sira-nia naran ka istória lokál, ne’ebé ajuda nafatin hanoin-hetan identidade kulturál fatin nian.
Notísia relevante: DNTT sei koloka funsionáriu iha terminál Maliana no Tunibibi
Jornalista: Sergio da Cruz
Editora: Maria Auxiliadora
