Bobonaru forma ekipa konjunta halo operasaun ba animál husik livre iha espasu públiku

BOBONARU, 24 Setembru 2026 (TATOLI) – Autoridade Munisípiu Bobonaru (AMB) forma ekipa konjunta ne’ebé kompostu hosi autoridade seguransa no defeza no lideransa komunitária atu implementa sirkulár Ijiene no Orden Públika, liuliu operasaun ba animál sira ne’ebé husik livre iha espasu públiku.

Prezidente Autoridade Munisípiu Bobonaru, Paulo Moniz Maia, hatete katak formasaun ekipa konjunta ne’e realiza hafoin autoridade Bobonaru konklui sosializasaun sobre Planu Munisipál Ordenamentu Territóriu (PMOT) no sirkulár kona-ba animál husik livre iha postu administrativu neen.

Sosializasaun ne’e ikus liu hala’o iha postu administrativu Lolotoe, iha 22 Setembru 2026, no bazeia ba Dekretu-Lei Númeru 34/2025, loron 15 Outubru, ne’ebé halo alterasaun ba Dekretu-Lei Númere 3/2016 kona-ba Estatutu Autoridade no Grupu Tékniku Interministeriál ba Desentralizasaun.

Paulo Moniz Maia salienta katak ekipa ne’e presiza hala’o operasaun konjunta ho mekanizmu klaru atu garante sirkulár ne’ebé sosializa ona bele implementa ho efetivu.

Notísia r elevante:AMB sosilializa sirkulár kona-ba ijiene no orden públika iha Maliana

“Sirkulár ida-ne’e atu funsiona di’ak, ita tenke forma ekipa konjunta ida atu realiza sirkulár ne’ebé ita halo. Se la’e povu sira dehan sirkulár ne’e mai sosializa tiha iha postu depois ninia implementasaun laiha”, nia hatete iha intervensaun ba atividade ne’ebé realiza iha salaun Maria Tapó, kinta-feira ne’e.

Antigu deputadu ne’e hatutan katak operasaun ne’e importante atu prevene risku ba seguransa komunidade, liuliu asidente tráfegu ne’ebé bele akontese tanba durante ne’e animál husik livre iha estrada no espasu públiku.

“Ita halo enkontru urjente ida ohin tanba asidente xoke barak ona, liuliu sira ho motór. Ita lakohi ema nia vida lakon hela de’it, tanba sá mak ita labele tuur hamutuk no implementa sirkulár ida-ne’e”, nia dehan.

Paulo esplika katak operasaun sei hala’o ho karreta atu rekolla animál sira ne’ebé husik livre iha estrada no área públika, la’ós atu buka animál iha to’os ka natar.

“Ita lori diman, ida ne’ebé han du’ut iha dalan no na’in la tau matan ita tau daudaun tula ba karreta depois mak na’in tuir ba koalia. Ida-ne’e la’ós atu estraga, maibé atu hadi’a ita-nia rai sai organizadu”, nia afirma.

Aleinde ne’e, Sekretáriu Autoridade Munisípiu Bobonaru ba Asuntu Planeamentu no Dezenvolvimentu Integradu Munisipál, Semedo Laco Costa, hatete ekipa konjunta ne’e sei serbisu ba tempu naruk no operasaun sei kontinua, la’ós hala’o dala ida de’it.

Nia esplika katak servisu ekipa ne’e bazeia ba kompeténsia ne’ebé delega ba Prezidente Autoridade Munisípiu, liuliu iha área Ijiene no Orden Públika.

“Operasau haree ba animál sira, ema sira ne’ebé kontrabandu, soe lixu arbiru ka halo uma liu espasu públiku. Hirak ne’e hotu ita tenke organiza”, nia dehan.

Semedo Laco Costa salienta katak objetivu husi operasaun ne’e atu ajuda komunidade kumpre regra no hadi’a ordenamentu iha munisípiu, liuliu iha sidade Maliana.

Nia husu komunidade sira ne’ebé hakiak animál atu tau iha luhan ka fatin ne’ebé apropriadu, no la husik animál sira movimenta livre iha estrada ka espasu públiku.

Sirkulár ne’e estabelese regra sira atu organiza no garante orden públika, limpeza no utilizasaun adekuada ba fasilidade públika sira, hanesan estrada, kanál irrigasaun, mobiliáriu urbanu, edifísiu públiku no espasu públiku seluk husi kapitál munisípiu to’o aldeia sira.

Sirkulár ne’e iha artigu 12 no multa ne’ebé sei aplika hahú husi $5 to’o $1.000, depende ba irregularidade ne’ebé infratór sira komete.

Notísia relevante: Autoridade Bobonaru prepara sirkulár bandu fase karreta-motór iha espasu públiku

Jornalista: Sergio da Cruz

Editora: Maria Auxiliadora