Projetu produsaun masin iha Oekusi, Outubru hahú kolleta rezultadu
OEKUSI, 24 Setembru 2026 (TATOLI) – Projetu Sentru produsaun masin, ne’ebé Governu liuhusi Ministériu Komérsiu no Industria (MCI) iha lagoa Maesmone suku Taiboko sub-rejiaun Rejiaun Administrativa Espesiál Oekusi Ambeno (RAEOA), sei hahú prosesamentu kolleta iha Outubru 2026 ne’e.
“Projetu produsaun masin ne’e, agora ita haree rasik hatudu ona rezultadu. Ohin ha’u foin simu informasaun husi Ministru MCI katak, ministériu iha ona planu, hahú loron 01 to’o loron 09 Outubru ita konsentra ona atu prosesaentu kolleta masin nian,” Diretór Servisu Rejionál Komérsiu no Industria Oekusi, Orlando Quelo, ba Ajénsia Tatoli,I.P iha Oekusi, ohin.
Notísia relevante:MCI klarifika: Projetu sentru produsaun masin iha Oekusi ‘la’ós’ abandonadu
Membru Autoridade RAEOA ne’e, esplika katak, projetu ne’e hahú konstrusaun iha 2025 finaliza iha fulan Dezembru, no tinan ne’e foku ba nia rezultadu, maibé husi Janeiru tama ona tempu udan, entaun prosesamentu ba masin la konsege, no adi’a to’o ohin loron tanba to’o Maiu Juñu sei kontinua udan, tanba nia rezultadu atu di’ak presiza loro-manas la presiza mákina hodi hamaran tasi-been atu sai masin.
Nia relembra katak, antes ne’e mós konstrusaun referida hetan afetasaun husi dezastre naturál tanba anin bo’ot estraga geomemran (lona), hafoin koordena fali parte tékniku sira husi nasaun viziñu hodi hadi’a hikas fali, tanba ne’e maka nia prosesu ba rezultadu finál kleur.
“Tuir tarjetu ami-nia bazeia planu MCI nian katak, fulan Agostu ne’e ita hahu ba prosesamentu kolleta, maibé la konsege agora foin finaliza loloos, agora tama ona faze kanalizasaun (hatama) tasi-been atu prepara ba produsaun masin, ne’ebé tama Outubru fulan oin ita komesa prosesa ba kolleta,” nia hateten.
Notísia relevante:Projetu produsaun masin iha Pante Makasar kontinua abandonadu, PDHJ observa direta
Entretantu, sentru investimentu produsaun masin ne’e, ezekuta husi kompañia lokál Baimnasi Unipesoál Lda ho valór kontratu rihun $50-resin, ne’ebé aloka direita husi Ministériu Komériu Indústria (MCI).
Jornalista: Abílio Elo Nini
Editór: Rafael Ximenes de A. Belo
