Prevene kazu dengue, SSMD prepara atu halo sensibilizasaun ba komunidade
DILI, 29 Setembru 2026 (TATOLI)—Diretór Servisu Saúde Munisípiu Dili, Mateus Pinto, hateten SSMD prepara ona atu halo sensibilizasaun ba komunidade kona-ba prevensaun kazu dengue.
“Ha’u hanoin ida-ne’e di’ak tebes. Tinan ida-ne’e, husi Janeiru to’o Marsu, ita hotu akompaña katak kazu sa’e maka’as depoiz sentru saúde no HNGV to’o fatin la to’o. Entaun, ba tinan 2027, ita la’ós halakon, maibé oinsá mak bele halo prevensaun. Signifika katak tinan oin ita bele redús kazu dengue, labele sa’e maka’as hanesan agora daudaun ne’e, tanba ita koordena ona oinsá mak bele fahe abate no mós fumigasaun ba área risku sira,” Mateus Pinto hateten iha nia kna’ar fatin, Hospital Nacional Guido Valadares (HNGV), Tersa ne’e.
Nia hateten iha ona koordenasaun atu halo fumigasaun ba eskola balun iha Postu Administrativu Dom Aleixo nian hodi redús kazu dengue.
Notísia relevante: Janeiru-Jullu 2026: MS rejista dengue 4.000, 52 grave no 32 hakotu iis
Husi Janeiru to’o Setembru, Servisu Saúde Munisípiu Dili rejistu moras dengue hamutuk 2.778. Husi númeru ne’e, pasiente na’in-17 mak mate.
Mateus informa presiza halo sosializasaun ba komunidade liuliu iha area afetadu sira hanesan Manleuana, Komoro, Bekora, Aimutin no fatin seluk tan ne’ebé mak risku ba dengue, tanba ne’e mak dadaun ne’e SSMD servisu hamutuk ho profisionál saúde sira atu kontinua halo monitorizasaun ba dadus rejistu iha kada área hodi identifika fatin sira-ne’ebé presiza intervensaun no prevensaun liután.
Antes ne’e, Vise-Ministru Saúde Fortalesimentu Institusionál, José Mango dos Reis, hateten kona-ba programa Wolbachia ne’ebé mak Governu liuhusi Ministériu Saúde hamutuk ho Menzies Timor-Leste implementa iha Munisípiu Dili daudaun ne’e atinje ona 80% no posbilidade espande ba munisípiu sira-ne’ebé ho ninia rezisténsia aas ne’e.
Nia dehan ho persentaje ne’ebé mak agora dadaun di’ak, espera katak bele hatudu rezultadu ne’ebé di’ak iha tinan sira tuirmai.
José Magno afirma agora 80% ne’e iha Munisípiu Dili de’it, tanba projetu ne’e projetu pilotu husi Governu ho parseiru, ne’e duni garante katak bele redús moras dengue iha Timor-Leste.
Jornalista: Felicidade Ximenes
Editór: Xisto Freitas da Piedade
