Konsellu Seguransa ONU hala’o votasaun dahaat ba kandidatu sira ba Sekretáriu-Jerál
DILI, 30 Setembru 2026 (TATOLI) – Konsellu Seguransa ONU nian hala’o ona sondajen ba dahaat iha loron-tersa ne’e kona-ba kandidatu sira ba kargu Sekretáriu-Jerál ONU nian tuirmai.
“Ronda dahaat hosi sondajen sira ne’ebé maka ladún di’ak hala’o ona,” hatete hosi Jerome Bonnafont, embaixadór ONU nian hosi Fransa – ne’ebé nia nasaun kaer prezidénsia rotativa hosi Konsellu Seguransa nian ba fulan-Setembru.
“Kandidatu ida-idak sei hetan informasaun hosi rezultadu sira liuhosi reprezentante permanente sira hosi Estadu-membru sira ne’ebé nomeia sira. Prezidente hosi Asembleia-Jeral ONU nian sei hetan mós informasaun katak halo ona sondajen,” nia hatete ba jornalista sira hafoin konkluzaun hosi votasaun sekretu.
Sondajen sira hosi Konsellu Seguransa nian kona-ba kandidatu sira ba Sekretáriu-Jerál maka konsulta informál sira, ho odamatan taka ne’ebé uza hodi sukat viabilidade hosi kandidatura sira. Rezultadu sira seidauk fó-sai ofisialmente.
Kandidatu na’in-hitu mantén iha kompetisaun ba pozisaun sekretáriu-jerál ONU tuir mai, hafoin retirada hosi eis-prezidente xilenu, Michelle Bachelet, iha inísiu fulan ne’e.
Kandidatu na’in-hitu ne’e maka: Rebeca Grynspan, eis-Vise Prezidente Kosta Rika no atuál Sekretária-Jerál Konferénsia Nasaun Unida nian kona-ba Komérsiu no Dezenvolvimentu; Carolyn Rodrigues-Birkett, Reprezentante Permanente Guyana nian ba Nasaun Unida; Ivonne A-Baki, eis-ministra no diplomata Ekuadór nian; Maria Fernanda Espinosa, eis-Prezidente Asembleia Jerál ONU nian no eis-Ministra Negósiu Estranjeiru no Defeza Ekuadór nian; Rafael Grossi, husi Arjentina, atuál Diretór Jerál Ajénsia Internasionál Enerjia Atómika nian; Olara Otunnu, hosi Uganda, eis-Sub-Sekretáriu-Jerál ONU nian; no Macky Sall, eis-Prezidente Senegal nian.
Mandatu hosi atuál sekretáriu-jerál ONU nian, António Guterres, hotu iha tinan ne’e nia rohan. Sekretáriu-Jerál tuirmai sei simu pose iha loron 1 fulan-Janeiru tinan 2027.
Notisia relevante: ONU hala’o votasaun preliminár datoluk ba kandidatu sira ba Sekretáriu-Jerál
Fonte: Xinhua
