Presu simente sa’e bá $6, PNDS mantein presu ne’ebé kontratu ho fornesedór
VIKEKE, 30 Setembru 2026 (TATOLI)—Diretór Programa Nasionál Dezenvolvimentu Suku (PNDS) Munisípiu Vikeke, Francisco Soares Varela, informa tuir prosesu aprovizionamentu suku katak empreza fornesedór sira hatama presu simente kada saka ho kustu $5,5 no $5,75.
“Regra PNDS tau iha kontratu katak dentru loron 120 nia laran ne’e folin sasán matein, kustu nafatin bazeia ba regra kontratu entre suku ho fornsedór sira. Nune’e, ami mós bolu ona fornesedór sira hodi esplika regra sira-ne’e ba ita-nia fornesedór sira katak presu sasán liliu presu simente sa’e seidauk liu loron 120, tan ne’e fornesedór sira tenke mantein presu tuir kontratu ne’ebé selebra ona,” Francisco ba TATOLI iha Postu Vikeke Vila, Kuarta ne’e.
Notísia relevante: https://tatoli.tl/2026/09/24/presu-simente-iha-vikeke-kada-saka-sae-ona-ba-6/
Nia hatutan bainhira liu ona loron 120, empreza fornesedór sira bele halo aposimasaun ho fasilitadór sira para ko’alia presu.
“Fornesedór sira tenke hatama simente ba obra PNDS. Bainhira fornesedór sira lakohi hatama, di’akliu halo karta rezignasaun tanba folin simente iha nasionál mós seidauk públika katak presu simente sa’e,” nia realsa.
Obra PNDS ba tinan 2026 nian hamutuk unidade 58, mak daudaun ne’e implementa iha suku 38 iha Munisípiu Vikeke, ho totál orsamentu millaun $1.
“Obra PNDS ne’ebé implementadu iha suku sira kompostu husi alargamentu sede suku, konstrusaun sede suku foun, refeitóriu ba merenda eskolár no estrada sirtu betaun sira,” Francisco esplika.
Jornalista: Vitorino Lopes da Costa
Editór: Xisto Freitas da Piedade
