Timor-Leste empata 2-2 kontra Kambódia iha estreia Grupu B FIFA ASEAN Cup 2026
DILI, 30 Setembru 2026 (TATOLI)–Ekipa nasionál Timor-Leste hahú ninia jornada iha Grupu B, FIFA ASEAN Cup 2026 ho rezultadu empata 2-2 kontra Kambódia, iha jogu ne’ebé hala’o durante minutu 90.
Tuir gráfiku rezultadu ofisiál ne’ebé publika husi ASEAN Futeból katak Timor-Leste loke golu uluk liuhusi João Pedro iha minutu 17, hodi fó vantajen 1-0 ba The Rising Sun.
Maibé Kambódia konsege halo comeback iha parte dahuluk liuhusi jogadór Andres Nieto, ne’ebé marka golu rua iha minutu 26 no minutu 38, hodi virada rezultadu ba 2-1 no taka dahuluk tempu ho vantajen ba Kambódia.
Notísia relevante : Selesaun Nasionál Futeból konfirmadu tama jogu ASEAN Hyundai Cup 2026
Tama ba parte daruak, Timor-Leste kontinua buka golu empata no konsege hetan liuhusi Corsino Lemos iha minutu 58 hodi determina rezultadu finál 2-2 to’o apitu finál.
Ho empata ne’e, Timor-Leste no Kambódia fahe pontu ida-idak iha klasifikasaun Grupu B.
Jogu ne’e hatudu espíritu luta a’as husi jogadór timoroan sira, ne’ebé konsege rekupera husi desvantajen 1-2 no evita derrota iha jogu abertura.
FFTL liuhusi ninia kanál ofisiál kontinua husu apoiu públiku nian ho lema “Hanoin ida hodi transforma futeból sai orgullu nasionál” no “Vamos, Timor-Leste!”.
Jornalista : Hortêncio Sanchez
Editora : Julia Chatarina
