Amahoro Cup 2026 promove talentu foinsa’e iha Tilomar
KOVALIMA , 01 Outubru 2026 ( TATOLI) – Associação Escola da Língua Japonesa (MIRAI SAT) no Associação AMAHORO hahú realiza Amahoro Cup 2026 ba dala III, hodi fó oportunidade ba foinsa’e liuliu feto sira atu dezenvolve talentu liuhusi atividade desportiva, iha Postu Administrativu Tilomar, Munisípiu Kovalima.
Amahoro Cup 2026 hala’o iha Kampu Futebol Maudemó, Salele, ho tema “Promove no dezenvolve talentu iha área desportu no kontribui ba moris saudável liuhusi ambiente ne’ebé moos”
Atividade ne’e partisipa husi modalidade futebol U-14 ba mane, ho partisipasaun klubu 10, no modalidade voleibol ba feto, ne’ebé organizadór la aplika limitasaun idade.
Responsável Amahoro Cup 2026, José Quintão Amaral, hatete katak torneiu ne’e sai oportunidade importante ida ba foin-sa’e no feto sira atu dezenvolve sira-nia kapasidade no talentu iha área desportu.
“Torneiu ida ne’e ita loke tanba hetan apoiu husi Associação Escola da Língua Japonesa MIRAI SAT no Associação AMAHORO, hahú husi 2024 to’o 2026. Agora ita hala’o ona ba dala III, ho apoiu orsamentu hamutuk $1.100 ba Amahoro Cup 2026,” José Quintão Amaral hatete ba jornalista iha Tilomar
Nia hatete katak iha períodu 2024 to’o 2025, atividade ne’e hetan apoiu osan husi asosiasaun hamutuk liu $1.000, enkuantu iha 2026 hetan apoiu orsamentál $1.100.
Tuir José Quintão Amaral, komisaun organizadora antes identifika klubu 15 ba modalidade futebol, maibé klubu lima la konsege partisipa tanba la hetan resposta. Ba modalidade voleibol feto, organizadór identifika klubu hitu, maibé klubu lima mak konklui partisipasaun iha edisaun tinan ida-ne’e.
Nia hatutan katak klubu sira ne’ebé la konsege partisipa iha Amahoro Cup 2026 sei hetan oportunidade atu partisipa iha edisaun 2027.
Iha fatin hanesan, Komandante PNTL Eskuadra Postu Administrativu Tilomar, Arcanjio Doutel Sarmentu, asegura katak PNTL sei kontinua akompaña atividade ne’e hodi garante seguransa durante kompetisaun.
“Hanesan seguransa, ami nafatin akompaña ita-boot sira no garante katak problema la iha. Ami parte seguransa nafatin asegura ita-boot sira durante atividade ne’e,” nia hatete.
Iha jogu inaugurasaun Amahoro Cup 2026, Klubu UNJOCA manán Klubu ONU LARAN ho rezultadu 2–1.
Jornalista: Celestina Teles
Editór: Florencio Miranda Ximenes
