Embaixadór Yonetani hato’o kompromisu Japaun apoiu integrasaun plena Timor-Leste iha ASEAN

DILI, 01 Outubru 2026 (TATOLI)–Embaixadór Estraordináriu no Plenipotensiáriu husi Misaun Japaun hamutuk Asosiasaun Nasaun Sudeste Aziátiku (ASEAN), Yonetani Koji, hamutuk ho delegasaun husi Embaixada Japaun iha Dili, Kinta ne’e, hasoru malu ho Prezidente Repúblika, José Ramos-Horta, iha Palásiu Prezidensiál, Bairru Pité.

Enkontru ne’e ho objetivu atu hato’o Japaun nia apoiu tomak ba Timor-Leste nia partisipasaun ativa iha atividade ASEAN, hafoin sai membru plenu organizasaun rejionál ne’e.

Embaixadór Yonetani Koji sente priviléjiu ida simu husi Prezidente Ramos-Horta hodi hato’o mensajen ofisiál Governu Japaun nian.

“Ida-ne’e atu hato’o Japaun nia apoiu tomak ba Timor-Leste nia partisipasaun ne’ebé efetivu ba atividade sira ASEAN nian. Ami fó bem-vindu ba adezaun formál Timor-Leste nian no komprometidu atu fó apoiu to’o iha nível tomak ninia integrasaun iha asosiasaun rejionál,” Yonetani Koji hato’o.

Notísia relevante : SEFOPE-Japaun deside atu troka programa TIT ba fali ESD

Nia mós hato’o apresiasaun ba Prezidente Repúblika nia apoiu kontinuadu ba relasaun di’ak no amizade entre nasaun rua ne’e.

Embaixadór ne’e subliña, kona-ba relasaun bilaterál, Japaun kontinua fó apoiu ba Timor-Leste iha área harii dame, dezenvolvimentu infraestrutura, atividade ekonómika no diversifikasaun ekonomia, inklui modernizasaun servisu saúde.

“Ha’u iha kapasidade nu’udar Embaixadór Japaun ba ASEAN, ha’u mai iha ne’e atu diskute kona-ba oinsá Japaun bele fó apoiu liután ba Timor-Leste nia partisipasaun no integrasaun ne’ebé efetivu iha atividade sira ASEAN nian,” nia tenik.

Diplomata ne’e hatutan, Japaun konvensidu katak Timor-Leste sei hetan benefísiu boot husi partisipasaun formál iha asosiasaun rejionál no adezaun ne’e sei loke oportunidade foun ba parseria ASEAN-Japaun hodi kontribui ba diversifikasaun ekonómika no dezenvolvimentu sosiál Timor-Leste nian.

Jornalista     : Hortêncio Sanchez

Editora          : Julia Chatarina