ME apresia manorin-na’in Ensinu Báziku ho GAT na’in-146 iha Oekusi

OEKUSI, 01 Outubru 2026 (TATOLI) –  Ministériu Edukasaun (ME) liuhusi Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál (ESJ-ESTV), Domingos Lopes Lemos, emite sertifikadu apresiasaun ba profesór Ensinu Báziku no Gabinete Apoia Tékniku Eskolár (GAT) hamutuk na’in-146 iha Rejiaun Administrativa Espesiál Oekusi Ambeno (RAEOA), hafoin kompleta formasaun kona-ba lideransa no jestaun durante oras 120 ne’ebé fasilita hosi Institutu Nasionál Formasaun Dosente no Profisionál Edukasaun (INFORDEPE).

Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál (ESJ-ESTV), Domingos Lopes Lemos, afirma katak sertifikadu ne’e nu’udar rekoñesimentu ofisiál ba líder eskola sira-ne’ebé susesu ona iha formasaun lideransa no jestaun, ne’ebé hala’o husi INFORDEPE iha tinan-2024.

Tanba ne’e, nia apela ba dirijente eskola sira, hodi utiliza matenek ne’ebé hetan durante formasaun, bele transforma ba iha ambiente edukasaun iha eskola idak-idak.

Governante, enkoraja lideránsa eskola sira atu kontinua hadi’a kualidade edukasaun liuhusi jestaun ne’ebé transparante no responsavel.

“Formasaun ne’e ho objetivu atu forma karaktér no kapasidade profisionál profesór sira-nian, nune’e dirijente eskola sira bele hatene loloos kna’ar tékniku no estratéjiku hodi lidera no hanorin iha eskola ho komunikasaun ne’ebé di’ak,” nia hateten iha salaun edukasaun Oekusi, ohin.

Notísia relevante:KFP atribui sertifikadu apresiasaun ba funsionáriu reformadu na’in-49 iha Oekusi

Iha biban ne’e, Prezidente INFORDEPE, Domingos Martins, informa, programa formasaun ne’e abranje módulu lima ho durasaun totál oras 120, ne’ebé kobre metodu aprendizajen prezensiál no distánsia.

“Detallu katak matéria sira-ne’ebé fahe iha formasaun ne’e inklui dijitalizasaun TIK (Teknolojia Informasaun no Komunikasaun), valór fraternidade umana nian, no étika profisionál ba profesór sira,” nia hateten.

Iha fatin hanesan, Diretór Servisu Rejionál Edukasaun Oekusi, Vincêncio Cono, espera dirijente eskola sira, tau atensaun másimu ba atendimentu públiku, foti desizaun sira-ne’ebé loos ho matenek ne’ebe iha, no kontinua dezenvolve an liuhusi teória no prátika ne’ebé hetan ona durante formasaun.

Notísia relevante:Autoridade RAEOA atribui sertifikadu apresiasaun ba atleta Taekwondo 13

Observasaun Jornalista Ajénsia Tatoli,I.P, katak, hafoin entrega sertifikadu, Sekretáriu Estadu ESJ no ESTV hamutuk ho Prezidente INFORDEPE entrega apoiu meiu ensinu nian hanesan mapa mundu ba líder eskola ida-idak atu hanorin siénsia sosiál, istória, no Jeográfia ba estudante sira iha nível Ensinu Báziku 1⁰ siklu to’o 3⁰ siklu.

Jornalista: Abílio Elo Nini

Editór: Rafael Ximenes de A. Belo