Sasán liu prazu, AIFAESA destroi item 1.111 inklui tabaku ilisitu iha Oekusi

OEKUSI, 01 Outubru 2026 (TATOLI) –  Autoridade Inspesaun Fiskalizasaun Atividade Ekonomia Sanitária no Alimentár (AIFAESA), akompaña ho Autoridade Rejiaun Administrativa Espesiál Oekusi Ambeno (RAEOA), halo destruisaun ba sasán sira-ne’ebé liu prazu hamutuk item 1.111 inklui tabaku ilisitu iha mota ponte Noefefan suku Lifau sub-rejiaun Pante Makasar.

Koordenadór AIFAESA destakadu Oekusi, Damiaun Meta, informa, destruisaun ne’e ba de’it sasán liu prazu, ne’ebé halo aprensaun iha trimestre datolu, hahú Jullu, Agostu no Setembru, ne’ebé prende husi operadór ekonómiku sira tantu área urbana no área rurál,

“Produtu sira-ne’e barakliu liu prazu, falta rekezitu ho nia kuantidade hamutuk 1.111, ne’e maka ohin ita destruisaun ne’e ba pradutu sira-ne’ebé durante ne’e ita halo aprensaun iha loja no kioske sira hahú husi urbana to’o nível suku no aldeia, inklui tabaku ilisíta sira, hamutuk 4.007, komposta husi masu, kaixa no slof,” nia hateten ba jornalista sira iha ponte Noefefan, ohin.

Nia esplika, produtu hirak ne’e hamutuk item 1.111, komposta husi alimentár la’ós alimentár tabaku ilisíta. Tanba ne’e,  AIFAESA, kontinua apela ba operadór ekonómiku sira iha Rejiaun Oekusi, katak tabaku ilisíta sira, lei bandu totál no bandu atu fa’an sasán liu prazu tanba afeta ba saúde komunidade.

“Tanba ne’e ita husu nafatin ba operadór ekonómiku sira atu kumpre lei ne’ebé estabelese ona, no antes ne’e mós AIFAESA hala’o ona sensibilizasaun ba públiku, molok hala’o inspesaun públiku, ne’ebé karik sira-ne’ebé lakoi kumpre, ita halo ona prensaun dalarua to’o tolu, aplika mós sasaun administrativa, no suspende provizória hodi kumpre, maibé agradese tanba iha trimestre daruak ne’e, laiha, tan ne’e husu nafatin atu kumpre,” nia fó hanoin.

Notísia relevante:AIFAESA halo destruisaun ba sasan liu prazu item 2.442 inklui tabaku ilisitu iha Oekusi

Sekretáriu Rejionál ba Asuntu Administrasaun no Finansa, Salvador da Cruz, hateten, sasán ne’ebé bandu ka liu prazu, AIFAESA iha kompeténsia másimu, atu halo aprensaun tanba importante saúde ema nian.

“Ita espera, aprensaun ne’e tenke halo nafatin to’o área rurál sira, tanba barak mak faan sasán la tuir Governu nia hakarak, hanesan lei sira, ida-ne’e mak ami-nia rekomendasaun, sei bele to’o fronteira sira,” nia hateten.

Notísia relevante:MP alega arguidu QN ho pena prizaun tinan lima

Jornalista: Abílio Elo Nini

Editór: Rafael Ximenes de A. Belo